അമേരിക്കന്‍ ഒടിടി പ്ലാറ്റ്ഫോം ആയ നെറ്റ്ഫ്ലിക്സിന്റെ സ്ട്രീംഫെസ്റ്റ് ആരംഭിച്ചു. രണ്ട് ദിവസത്തേക്ക് സൗജന്യമായി നെറ്റ്ഫ്ലിക്‌സിലെ വീഡിയോകള്‍ കാണാം എന്നതാണ് നെറ്റ്ഫ്ലിക്‌സ് സ്ട്രീംഫെസ്റ്റിന്റെ ആകര്‍ഷണം. ഡിസംബര്‍ 5 (ശനി), 6 (ഞായര്‍) ദിവസങ്ങളിലായി ക്രമീകരിച്ചിരിക്കുന്ന നെറ്റ്ഫ്ലിക്‌സ് സ്ട്രീംഫെസ്റ്റില്‍ ഒടിടി പ്ലാറ്റ്‌ഫോമിലെ ഏത് വീഡിയോയും 48 മണിക്കൂര്‍ നേരം സൗജന്യമായി കാണാം.

സ്റ്റാന്‍ഡേര്‍ഡ് ഡെഫിനിഷനില്‍ (SD) മാത്രമേ സ്ട്രീംഫെസ്റ്റില്‍ വീഡിയോകള്‍ കാണാന്‍ സാധിക്കൂ (ഹൈ ഡെഫിനിഷനില്‍ ലഭ്യമല്ല). ബാക്കി എല്ലാം നെറ്റ്ഫ്ലിക്‌സിന്റെ അടിസ്ഥാന പാക്ക് ആയ Rs. 499-ന് സമാനമാണ്. മൈ ലിസ്റ്റ് തയ്യാറാക്കാനും, കണ്‍ട്രോളുകളില്‍ മാറ്റം വരുത്താനും, ഭാഷ ക്രമീകരണത്തില്‍ മാറ്റം വരുത്താനും, സബ്‌ടൈറ്റിലുകള്‍ തിരഞ്ഞെടുക്കാനും നെറ്റ്ഫ്ലിക്‌സ് സ്ട്രീംഫെസ്റ്റിന്റെ സമയത്ത് സാധിക്കും. ആന്‍ഡ്രോയിഡ്, ഐഫോണ്‍, സ്മാര്‍ട്ട് ടിവി, ഗെയിമിംഗ് കണ്‍സോള്‍ എന്നിങ്ങനെ വിവിധ മാദ്ധ്യമങ്ങളിലൂടെ നെറ്റ്ഫ്ലിക്‌സ് വീഡിയോകള്‍ കാണാന്‍ സ്ട്രീംഫെസ്റ്റ് സൗകര്യം ഒരുക്കുന്നുണ്ട്.

Netflix.com/StreamFest ലിങ്ക് വഴിയാണ് നെറ്റ്ഫ്ലിക്‌സ് സ്ട്രീംഫെസ്റ്റിനായി സൈന്‍ അപ്പ് ചെയ്യേണ്ടത്.സാധാരണഗതിയില്‍ സൗജന്യ സേവനം എന്ന് പറഞ്ഞാലും ഉപഭോക്താവിന്റെ കാര്‍ഡ്/നെറ്റ് ബാങ്കിംഗ് വിവരങ്ങള്‍ തേടുന്ന പതിവ് സ്ട്രീംഫെസ്റ്റിലില്ല എന്ന് നെറ്റ്ഫ്ലിക്‌സ് വ്യക്തമാക്കിയിട്ടുണ്ട്. ഉപഭോക്താവിന്റെ പേര്, മേല്‍വിലാസം, ഇമെയില്‍ ഐഡി, ഫോണ്‍ നമ്പര്‍, ഒരു പാസ്സ് വേര്‍ഡ് എന്നിവ മാത്രം നല്‍കിയാല്‍ മതിയാകും. മുന്‍പ് നെറ്റ്ഫ്ലിക്‌സ് ഉപയോഗിച്ചിട്ടുണ്ടെങ്കില്‍ നെറ്റ്ഫ്ലിക്‌സ് സ്ട്രീംഫെസ്റ്റിലെ വീഡിയോകള്‍ കാണാന്‍ സൈന്‍ ഇന്‍ ചെയ്താല്‍ മാത്രം മതി.

നെറ്റ്ഫ്ലിക്‌സ് നിരക്കുകള്‍

ഒരു സമയം ഒരു മൊബൈല്‍ മാത്രം (Android, iOS) SD സ്ട്രീം ചെയ്യുന്നതിന് 199 രൂപയാണ് നെറ്റ്ഫ്ലിക്‌സ് ഈടാക്കുന്നത്. മറ്റ് ഉപകരണങ്ങളിലും നെറ്റ്ഫ്ലിക്‌സ് ലഭിക്കുന്ന അടിസ്ഥാന പാക്കിന് 499 രൂപയാണ്. Rs. 649 സ്റ്റാന്‍ഡേര്‍ഡ് പ്ലാനില്‍ ഒരേസമയം രണ്ട് ഉപകരണങ്ങളില്‍ ഹൈ-ഡെഫനിഷന്‍ (എച്ച്ഡി) സ്ട്രീമിംഗ് ചെയ്യാന്‍ സാധിക്കും. അതെസമയം, ഡിസ്‌നി + ഹോട്ട്സ്റ്റാര്‍ പ്രീമിയം പോലുള്ള എതിരാളികളുടെ സബ്‌സ്‌ക്രിപ്ഷന്‍ ആരംഭിക്കുന്നത് ഒരു മാസത്തേക്ക് 299 രൂപ മുതലാണ്. അതെസമയം, ആമസോണ്‍ പ്രൈം 30 ദിവസത്തെ സൗജന്യ ട്രയല്‍ ഒരുക്കിയിട്ടുണ്ട്.