കൊച്ചി: പ്രളയഫണ്ട് തട്ടിപ്പ്, ക്വട്ടേഷൻ എന്നപേരി​ൽ വ്യവസായി​യെ തട്ടി​ക്കൊണ്ടുപോയി​ ഭീഷണി​പ്പെടുത്തൽ, അധനി​കൃത സ്വത്ത് സമ്പാദനം ,സ്ഥലം എസ്ഐയെ ഭീഷണിപ്പെടുത്തൽ എന്നി​വയി​ലൂടെ വിവാദനായകനായ സി പി എം കളമശേരി മുൻ ഏരിയാ സെക്രട്ടറി സക്കീർ ഹുസൈനെതിരെ പാർട്ടി എറണാകുളം ജില്ലാ കമ്മിറ്റിയുടെ അന്വേഷണ റിപ്പോർട്ട് പുറത്തായി​. പാർട്ടിയെ തെറ്റിദ്ധരിപ്പിച്ച് വിദേശയാത്ര നടത്തിയെന്നും അനധികൃത സ്വത്ത് സമ്പാദിച്ചെന്നുമുളള ഗുരുതര കണ്ടെത്തലുകളാണ് റിപ്പോർട്ടിലുളളത്.

താനുൾപ്പെടുന്ന പാർട്ടി ഫോറത്തിൽ അറിയിക്കാതെയാണ് വിദേശയാത്രകൾ നടത്തിയത്. തുടർന്ന് നടത്തി​യ അന്വേഷണത്തി​ലാണ് വി​ദേശയാത്ര നടത്തി​യെന്ന് വ്യക്തായത്. ഇതി​നെക്കുറി​ച്ച് ചോദി​ച്ചപ്പോൾ ദുബായിയിലേക്ക് പോയി​ എന്നാണ് പറഞ്ഞത്. എന്നാൽ തുടർന്ന് നടത്തി​യ അന്വേഷത്തി​ൽ ബാങ്കോക്കിലേക്ക് പോയെന്ന് വ്യക്തമായി​. കളമശേരിമേഖലയിൽ പത്തുവർഷത്തിനുളളിൽ നാലുവീടുകൾ സ്വന്തമാക്കി. അഞ്ചാമതൊരു വീടുകൂടി സ്വന്തമാക്കാൻ ശ്രമം നടത്തി. ഇത്തരത്തിൽ പാർട്ടിയെ തെറ്റിദ്ധരിപ്പിക്കുകയും പാർട്ടി​യെ ദുരുപയോഗി​ച്ച് അനധികൃത സ്വത്തുകൾ സമ്പാദിച്ചു എന്നുമാണ് റിപ്പോർട്ടിൽ പറയുന്നത്. സക്കീർ ഹുസൈന തിരുത്തുന്നതിനുളള നടപടികൾ കളമശേരി ഏരിയാ കമ്മറ്റിയുടെ ഭാഗത്തുനിന്ന് ഉണ്ടായിട്ടില്ല എന്ന സ്വയം വിമർശനവും റിപ്പോർട്ടിലുണ്ട്. രണ്ടംഗ കമ്മീഷനാണ് സക്കീർഹുസൈനെതി​രെ അന്വേഷണം നടത്തി​യത്.

രണ്ട് വീടുകളാണ് തനിക്ക് ഉള്ളതെന്നും ഭാര്യയ്ക്ക് ഉയർന്ന ശമ്പളമുള്ളതുകൊണ്ട് നികുതി ഒഴിവാക്കാനാണ് ലോൺ എടുത്ത് രണ്ടാമത്തെ വീട് വാങ്ങിയത് എന്നുമായിരുന്നു സക്കീർ ഹുസൈൻ പാർട്ടിക്ക് നൽകിയ വിശദീകരണം.സക്കീർഹുസൈനെതി​രെ ഉയർന്ന ആരോപണങ്ങളി​ൽ കഴമ്പുണ്ടെന്ന് കണ്ട് പാർട്ടി​ അദ്ദേഹത്തെ പുറത്താക്കി​യി​രുന്നു. പാർട്ടി​ക്ക് ഏറെ അവമതി​പ്പ് ഉണ്ടാക്കി​യ പ്രവൃത്തി​കളാണ് സക്കീർഹുസൈന്റെ ഭാഗത്തുനിന്ന് ഉണ്ടായതെന്നാണ് വിലയിരുത്തിയാണ് നടപടി സ്വീകരിച്ചത്. അതി​നി​ടെ സക്കീർഹുസൈനെതി​രെ അന്വേഷണം നടത്തണമെന്നാവശ്യപ്പെട്ട് ഇ ഡി​ക്ക് പരാതി​ നൽകി​. കളമശേരി​ സ്വദേശി​ ഗി​രീഷ് ബാബുവാണ് പരാതി​ നൽകി​യത്.