ലുവാണ്ട: വജ്ര ഖനനത്തിന് പ്രസിദ്ധമാണ് ആഫ്രിക്കന്‍ രാജ്യങ്ങള്‍. ആയിരക്കണക്കിന് കമ്പനികളാണ് ഈ മേഖലകളില്‍ വജ്രം കണ്ടെത്താനുള്ള പ്രവര്‍ത്തനം തുടരുന്നത്. മണ്ണിലൊളിച്ചിരിക്കുന്ന സമ്പത്ത് തേടി വിവിധ ഖനികളിലായി ആയിരങ്ങള്‍ ജോലി ചെയ്യുന്നുണ്ട്.
ഇതിനിടെ ആഫ്രിക്കന്‍ രാജ്യങ്ങളില്‍ വജ്ര ഉല്‍പ്പാദനത്തില്‍ മൂന്നാം സ്ഥാനത്തുള്ള അംഗോള ഇന്ത്യന്‍ കമ്പനികളെ സ്വാഗതം ചെയ്യുകയാണ്. ജെംസ് ആന്റ് ജുവല്ലറി എക്സ്പോര്‍ട് പ്രൊമോഷന്‍ കൗണ്‍സില്‍ ഓഫ് ഇന്ത്യയാണ് ഇതു സംബന്ധിച്ച വിവരങ്ങള്‍ വ്യക്തമാക്കിയത്. വജ്രം വലിയ തോതില്‍ വാങ്ങിക്കുട്ടുന്ന ഇന്ത്യന്‍ കമ്പനികളെ രാജ്യത്തേക്ക് ക്ഷണിക്കുന്നതിലൂടെ വിദേശ നിക്ഷേപം ശക്തിപ്പെടുത്തുകയാണ് അംഗോള ലക്ഷ്യം വയ്ക്കുന്നത്.
രാജ്യത്തെ ഇതുവരെ നാല്പത് ശതമാനം പ്രദേശങ്ങളില്‍ മാത്രമാണ് വജ്രത്തിനായുള്ള ഖനനം നടന്നിട്ടുള്ളത്.ഈ സാഹചര്യത്തിലാണ് ഇന്ത്യന്‍ കമ്പനികളെ ആഫ്രിക്കന്‍ രാജ്യം ക്ഷണിക്കുന്നത്. ഇന്ത്യന്‍ കമ്പനികളില്‍ നിന്ന് നേരിട്ടുള്ള നിക്ഷേപം പ്രതീക്ഷിക്കുന്ന അംഗോളയുമായി ഇന്ത്യക്ക് വലിയ തോതിലുള്ള ഇടപാടുകള്‍ നിലവിലുണ്ട്.അംഗോളയില്‍ നിന്നുള്ള കയറ്റുമതിയുടെ 10ശതമാനം ഇന്ത്യയിലേക്കാണ്. ഇന്ത്യയിലേക്ക് ആഭരണങ്ങള്‍ കയറ്റി അയക്കുന്ന രണ്ടാമത്തെ വലിയ ആഫ്രിക്കന്‍ രാജ്യമാണ് അംഗോള. അംഗോളയില്‍ നിന്ന് ഇന്ത്യ ഇറക്കുമതി ചെയ്യുന്ന ഡയമണ്ടിന്റെ മൂല്യം 2019-20 കാലത്ത് 6.01 ദശലക്ഷം ഡോളറായിരുന്നു.
ഇന്ത്യന്‍ കമ്പനികള്‍ സ്വര്‍ണവും വജ്രവും വാങ്ങുന്നുണ്ടെങ്കിലും വജ്ര ഉത്പാദനം 90 ലക്ഷം കാരറ്റില്‍ നിന്ന് 1.50 കോടി കാരറ്റിലേക്ക് എത്തിക്കാനാണ് അംഗോളയുടെ ശ്രമം. ഇന്ധന കയറ്റുമതിക്ക് രാജ്യം കൂടുതല്‍ പരിഗണന നല്‍കുന്നുണ്ട്. ഈ സാഹചര്യത്തില്‍ ഇന്ത്യന്‍ കമ്പനികളെ രാജ്യത്തേക്ക് ക്ഷണിക്കുന്നതിലൂടെ മറ്റ് മേഖലകള്‍ സാമ്പത്തിക ഭദ്രത കൈവരിക്കുമെന്ന നിഗമനത്തിലാണ് അംഗോള. ഈ സാഹചര്യത്തില്‍ വജ്ര ഉത്പാദനത്തിനായി ഇന്ത്യന്‍ കമ്പനികളുമായി രണ്ട് വര്‍ഷത്തെ കരാറിനാണ് രാജ്യം ശ്രമിക്കുന്നത്.