കൊല്ലം: അരിവാൾ ചുറ്റിക നക്ഷത്രം പതിപ്പിച്ച മാസ്ക് ധരിച്ചെത്തിയ വനിതാ പ്രിസൈഡിംഗ് ഓഫീസറെ ഡ്യൂട്ടിയിൽ നിന്ന് മാറ്റിനിറുത്തി. കൊല്ലം മുഖത്തല ബ്ലോക്കിലെ കൊറ്റങ്കര ജില്ലാ പഞ്ചായത്ത് പരിധിയിലെ ജോൺസ് കശുവണ്ടി ഫാക്ടറിയിലെ ഒന്നാം നമ്പർ ബൂത്തിലാണ് സംഭവം.

ഉദ്യോഗസ്ഥ അരിവാൾ ചുറ്റിക നക്ഷത്രം ചിഹ്നം പതിപ്പിച്ച മാസ്ക് ധരിച്ച് ബൂത്തിലെത്തിയതിനെതിരെ ബി ജെ പി, യു ഡി എഫ് പ്രവർത്തകർ രംഗത്തെത്തി. തുടർന്ന് ഇവർ രേഖാമൂലമുളള പരാതി ജില്ലാ കളക്ടർക്ക് കൈമാറുകയും ചെയ്തു. അതിന്റെ അടിസ്ഥാനത്തിൽ ജില്ലാ കളക്ടറാണ് ഉദ്യോഗസ്ഥയെ തിരഞ്ഞെടുപ്പ് ചുമതലകളിൽ നിന്ന് മാറ്റിനിറുത്തിയത്. പകരം ചുമതല മറ്റൊരു ഉദ്യോഗസ്ഥന് കൈമാറുകയും ചെയ്തു. സംഭവത്തെക്കുറിച്ച് അന്വേഷിക്കാൻ ജില്ലാകളക്ടർ ഉത്തരവിട്ടു. സംഭവം നിയമപരമായി നേരിടുമെന്ന് കൊല്ലം ഡി സി സി പ്രസിഡന്റ് ബിന്ദുകൃഷ്ണ പറഞ്ഞു.

പാർട്ടി ചിഹ്നങ്ങൾ ഒരു കാരണവശാലും ബൂത്തിലോ സമീപത്തോ അനുവദിക്കില്ലെന്ന് തിരഞ്ഞെടുപ്പ് കമ്മിഷൻ നേരത്തേ വ്യക്തമാക്കിയിരുന്നു.