വാഷിങ്​ടൺ: കൊവിഡ് 19നെ ചെറുക്കാൻ ജനങ്ങൾ ഫൈസർ വാക്സിൻ ഉപയോഗിക്കുന്നത് സുരക്ഷിതമെന്ന് യു.എസ്. ഫുഡ് ആൻഡ് ഡ്രഗ് അഡ്മിനിസ്ട്രേഷൻ അറിയിച്ചു. വാക്സിൻ ഉപയോഗിക്കുന്നതിൽ ആശങ്കപ്പെടേണ്ടതില്ലെന്നും റിപ്പോർട്ടിൽ പറയുന്നു. 38,000 പേരിൽ നടത്തിയ പരീക്ഷണങ്ങൾക്കൊടുവിലാണ്​ ഏജൻസിയുടെ കണ്ടെത്തൽ.

എത്രയും പെട്ടന്ന്​ വാക്​സിൻ ഉപയോഗിക്കാൻ കഴിയുമെന്നും ഏജൻസി വ്യക്​തമാക്കിയിട്ടുണ്ട്​. വാക്​സിന്​ അനുമതി നൽകാൻ എഫ്​.ഡി.എ അംഗങ്ങൾ യോഗം ചേരാനിരിക്കെയായാണ്​ ഏജൻസിയുടെ റിപ്പോർട്ട് പുറത്തുവന്നത്.

അതേസമയം വാക്സിൻ പ്രയോഗിക്കാൻ അമേരിക്കയിലെ ജനങ്ങൾ ആശങ്ക കാട്ടുന്നതായി നേരത്തെ വാർത്തകൾ പുറത്തുവന്നിരുന്നു. ഈ സാഹചര്യത്തിൽ വാക്സിന്റെ ആവശ്യകത ജനങ്ങളെ മനസിലാക്കിക്കൊടുക്കാനും അതിനോടുള്ള ഭയവും വിമുഖതയും മാറ്റാനും രാജ്യത്തെ മുൻ പ്രസിഡന്റുമാരായ ബറാക്​ ഒബാമ, ബിൽ ക്ലിന്റൺ, ജോർജ്​ ഡബ്ല്യു. ബുഷ്​ എന്നിവർ പൊതുജനത്തിന് മുന്നിൽ വാക്സിൻ കുത്തിവയ്ക്കാൻ തയാറാണെന്ന് അറിയിച്ചിരുന്നു.