കോലഞ്ചേരി: വോട്ടു ചെയ്തതായി തിരിച്ചറിയാൻ മഷിയടയാളം കൈയിൽ വീഴും മുമ്പ് ഓരോ വോട്ടറും അറിയുന്നുണ്ടോ നിർബന്ധമായും പാലിക്കേണ്ട ഒരു പ്രതിജ്ഞാ വാചകം മഷിക്കവറിനു മുകളിലുണ്ടെന്ന്. തിരഞ്ഞെടുപ്പ് കമ്മിഷന്റെ നിർദേശ പ്രകാരം മഷി നിർമ്മിച്ചു നല്കുന്ന മൈസൂർ പെയിന്റ്സ് ആൻഡ് വാർണീഷിംഗ് കമ്പനിയാണ് പ്രതിജ്ഞാ വാചകം കവറിനു മുകളിൽ പ്രിൻഡ് ചെയ്തിരിക്കുന്നത്.

' ടു കാസ്റ്റ് വോട്ട്, ഐ ഷാൽ നോട്ട് ബീ ബ്രൈബ്ഡ് ഓർ കറ്ര്രപഡ് ഇൻ എനി മാനർ, ദെ ആർ ഡെയ്ഞ്ചറസ് ടു ഔർ നേഷൻ എന്ന് ഇംഗ്ലീഷിലാണ് പ്രതിജ്ഞാ വാചകം. വോട്ടു ചെയ്യാൻ ഒരു തരത്തിലുള്ള അഴിമതിക്കും താൻ വഴിപ്പെടില്ലെന്നും അത് രാജ്യത്തിന് അപകടകരമെന്നുമാണ് സാരം. വോട്ടർമാർ കവർ കാണാത്തത് കൊണ്ട് പ്രതിജ്ഞയും കാണാറില്ല. എന്നിരുന്നാലും വോട്ടിന് വേണ്ടി ഒരു സ്വാധീനമില്ലാതെയാണ് വോട്ടു ചെയ്തതെന്ന് ഓരോ പൗരനും ഈ പ്രതിജ്ഞയിലൂടെ അറിഞ്ഞോ അറിയാതയോ വെളിപ്പെടുത്തുകയാണ്.