കൊൽക്കത്ത: പശ്ചിമബംഗാൾ മുൻമുഖ്യമന്ത്രിയും സി പി എം നേതാവുമായ ബുദ്ധദേവ് ഭട്ടാചാര്യയുടെ ആരോഗ്യനില ഗുരുതരമായി തുടരുന്നതായി വിവരം. ശ്വാസതടസത്തെ തുടർന്ന് ആശുപത്രിയിൽ പ്രവേശിപ്പിച്ച അദ്ദേഹത്തിന്റെ ആരോഗ്യനിലയിൽ മാറ്റമില്ലെന്നാണ് ആശുപത്രി അധികൃതർ പറയുന്നത്. ഭട്ടാചാര്യയുടെ നില ഗുരുതരമാണെന്ന് ബംഗാളിലെ പ്രാദേശിക മാദ്ധ്യമങ്ങളടക്കം റിപ്പോർട്ട് ചെയ്യുന്നുണ്ട്.
ബുദ്ധദേവ് ഭട്ടാചാര്യയുടെ കൊവിഡ് പരിശോധനാ ഫലം നെഗറ്റീവാണെന്നും ചികിത്സയോട് പ്രതികരിക്കുന്നുണ്ടെന്നും അദ്ദേഹത്തെ ചികിത്സിക്കുന്ന ഡോക്‌ടർമാർ പ്രതികരിച്ചു. വെന്റിലേറ്ററിന്റെ സഹായത്തോടെയാണ് അദ്ദേഹം ഇപ്പോൾ ശ്വസിക്കുന്നത്. കൊൽക്കത്തയിലെ വു‌ഡ്‌‌ലാ‌ന്റ്‌ ആശുപത്രിയിലാണ് ഭട്ടാചാര്യയെ പ്രവേശിപ്പിച്ചിരിക്കുന്നത്.
ബുദ്ധദേവ് ഭട്ടാചാര്യയുടെ ആരോഗ്യ സ്ഥിതിയിൽ ആശങ്ക പ്രകടിപ്പിച്ച മുഖ്യമന്ത്രി മമതാ ബാനർജി, ആശുപത്രിയിലെത്തുകയും കുടുംബത്തിന് എല്ലാ സഹായങ്ങളും വാഗ്‌ദ്ധാനം ചെയ്യുകയും ചെയ്‌തു. ഗവർണർ ജഗ്‌ദീപ് ധങ്കറും ആശുപത്രിയിലെത്തി മുൻ മുഖ്യമന്ത്രിയുടെ ആരോഗ്യനില വിലയിരുത്തി.