മുംബയ്: 4ജി സ്മാർട്ട്ഫോണുകളുടെ വില ഗണ്യമായി കുറച്ച് സാധാരണക്കാരന് താങ്ങാനാകുന്ന നിലയിലാക്കാൻ ഫോൺ കമ്പനികളുമായി വൻ ചർച്ചകൾ നടത്തി റിലയൻസ് ജിയോ. ഇതുവഴി ഇന്ത്യയിലെ ഇപ്പോഴുള്ള 2ജി ഉപഭോക്താക്കൾക്ക് അനായാസം 4ജിയിലേക്ക് മാറാമെന്നാണ് കമ്പനി കാണുന്ന നേട്ടം.

ഇത് സംബന്ധിച്ച് റിയൽ മി അടക്കമുള്ള കമ്പനികളുമായി ജിയോയുടെ ഉന്നതർ ചർച്ചകൾ തുടങ്ങിക്കഴിഞ്ഞെന്ന് ഡിവൈസസ് ആന്റ് മൊബിലിറ്റി വിഭാഗം പ്രസിഡന്റായ സുനിൽ ദത്ത് ഇപ്പോൾ അറിയിച്ചിരിക്കുകയാണ്. ദേശീയ മാദ്ധ്യമമായ ഹിന്ദുസ്ഥാൻ ടൈംസ് ആണ് ഇക്കാര്യം റിപ്പോർട്ട് ചെയ്തത്.

മൊബൈൽ ഫോൺ സെഗ്മെന്റിൽ മാത്രമല്ല കണക്ടഡ് ഡിവൈസസിന്റെ കാര്യത്തിലും വൻ മാറ്റങ്ങൾക്കാണ് കമ്പനി ഒരുങ്ങുന്നത്. ഇന്ത്യയിൽ 5ജി കണക്ടിവിറ്റി വരുന്നത് ഒരുപാട് സാദ്ധ്യതകൾ തുറക്കുമെന്നും അത് സ്മാർട്ട്ഫോണുകൾക്ക് മാത്രമായി പരിമിതമാകില്ലെന്നുമാണ് റിയൽമി സി.ഇ.ഒ മാധവ് ഷേത്ത് പറയുന്നത്.

സാങ്കേതിക വിദ്യയിൽ കുറവ് വരുത്താതെ 5ജി സ്മാർട്ട്ഫോൺ ഡിവൈസുകൾ കുറഞ്ഞ വിലയ്ക്ക് ലഭ്യമാക്കാനാണ് തങ്ങൾ ശ്രമിക്കുന്നതെന്ന് ഷേത്ത് ദേശീയ മാദ്ധ്യമത്തോട് വ്യക്തമാക്കിയിട്ടുണ്ട്.