തിരുവനന്തപുരം : അഴിമതി ആരോപണത്തിൽ സ്പീക്കർ ശ്രീരാമകൃഷ്ണനെതിരെ അന്വേഷണത്തിന് ഉത്തരവിടണമെന്നാവശ്യപ്പെട്ട് പ്രതിപക്ഷനേതാവ് രമേശ് ചെന്നിത്തല ഗവർണർക്ക് കത്ത് നൽകി. നിയമസഭയിൽ കോടിക്കണക്കിന് രൂപയ്ക്കുളള കരാറുകൾ ചട്ടങ്ങൾ ലംഘിച്ച് ഊരാളുങ്കൾ സൊസൈറ്റി അടക്കമുള്ള ഏജൻസികൾക്ക് നൽകിയതിലെ അഴിമതിയും ധൂർത്തും അന്വേഷിക്കണമെന്നാണ് കത്തിലൂടെ ആവശ്യപ്പെടുന്നത്.

2017ൽ ലോകകേരള സഭ നടത്തിപ്പുമായി ബന്ധപ്പെട്ട കരാറിലും 53 കോടി രൂപ മുടക്കി നടപ്പിലാക്കിയ ഇ നിയമസഭ പദ്ധതിയിലും മഹാപ്രളയദുരന്തം നേരിടുന്ന സമയത്തും ഫെസ്റ്റിവൽ ഓൺ ഡെമോക്രസി എന്ന പരിപാടി നടത്തി കോടികൾ ചെലവഴിച്ച സ്പീക്കറുടെ നടപടിയിൽ അഴിമതിയും ധൂർത്തും ഉണ്ടെന്നാണ് ചെന്നിത്തലയുടെ ആരോപണം. ഇക്കാര്യത്തിൽ സമഗ്ര അന്വേഷണത്തിന് ഗവർണർ ഉത്തരവ് ഇടണമെന്നാണ് കത്തിൽ ആവശ്യപ്പെടുന്നത്.