ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം കുതിച്ചുയരുന്നു. ആറ് ലക്ഷത്തി എൺപതിനായിരത്തിലധികം പുതിയ കേസുകളാണ് റിപ്പോർട്ട് ചെയ്തത്. ഇതോടെ ആകെ രോഗബാധിതരുടെ എണ്ണം ഏഴ് കോടി പതിമൂന്ന് ലക്ഷം പിന്നിട്ടു. മരണസംഖ്യ പതിനാറ് ലക്ഷം കടന്നു. നാല് കോടി തൊണ്ണൂറ്റിയഞ്ച് ലക്ഷം പേർ രോഗമുക്തി നേടി. അമേരിക്ക, ഇന്ത്യ, ബ്രസീൽ, റഷ്യ തുടങ്ങിയ രാജ്യങ്ങളിലാണ് ഏറ്റവും കൂടുതൽ രോഗികളുള്ളത്.

ലോകത്ത് ഏറ്റവും കൂടുതൽ പേർ കൊവിഡ് ബാധിച്ച് മരിച്ചത് അമേരിക്കയിലാണ്. മൂന്ന് ലക്ഷത്തിലധികം പേരാണ് രാജ്യത്ത് വൈറസ് ബാധമൂലം മരണമടഞ്ഞത്. രോഗബാധിതരുടെ എണ്ണം ഒരുകോടി അറുപത്തിരണ്ട് ലക്ഷം പിന്നിട്ടു. രണ്ട് ലക്ഷത്തിലധികം പുതിയ കേസുകളാണ് റിപ്പോർട്ട് ചെയ്തത്. തൊണ്ണൂറ്റിനാല് ലക്ഷം പേർ രോഗമുക്തി നേടി.

ഇന്ത്യയിൽ കൊവിഡ് ബാധിതരുടെ എണ്ണം 98 ലക്ഷം കടന്നു. മരണം 1,​42,​500 പിന്നിട്ടു. നിലവിൽ 3.63 ലക്ഷത്തിൽ താഴെ പേർ മാത്രമേ ചികിത്സയിലുള്ളു. ആകെ രോഗബാധിതരുടെ 3.71 ശതമാനമാണ് ഇത്. രോഗമുക്തി നിരക്ക് 94.84 ശതമാനമായി ഉയർന്നു.

ബ്രസീലിൽ അറുപത്തിയെട്ട് ലക്ഷം പേർക്കാണ് കൊവിഡ് സ്ഥിരീകരിച്ചത്. 1,80,453 പേർ മരിച്ചു. രോഗമുക്തി നേടിയവരുടെ എണ്ണം അമ്പത്തിയൊമ്പത് ലക്ഷം പിന്നിട്ടു. റഷ്യയിൽ ഇരുപത്തിയഞ്ച് ലക്ഷത്തിലധികം പേർക്കാണ് വൈറസ് ബാധ സ്ഥിരീകരിച്ചത്.