കാൻസർ ബാധിതനായി ചികിത്സയിൽ കഴിയുമ്പോഴാണ് ഫോറസ്​റ്റ് ഫെൻ ഇനിയുള്ള ജീവിതം കൂടുതൽ മനോഹരമാക്കാൻ ജനങ്ങളെ കൊണ്ട് സാഹസിക കൃത്യങ്ങൾ ചെയ്യിക്കണമെന്ന വിചിത്ര ചിന്തയിലെത്തിയത്. തുടർന്ന് റോക്കി മലനിരകളിൽ നിധി കുഴിച്ചിട്ടു. വടക്കേ അമേരിക്കയുടെ പടിഞ്ഞാറുഭാഗത്തായി സ്ഥിതിചെയ്യുന്ന റോക്കി മലനിരകൾ, കാനഡയിലെ ബ്രിട്ടീഷ് കൊളംബിയ മുതൽ അമേരിക്കൻ ഐക്യനാടുകളിലെ ന്യൂ മെക്സിക്കോ വരെ 4800 കിലോമീ​റ്റർ വ്യാപിച്ചുകിടക്കുന്നു.

സ്വർണക്കട്ടികളും അപൂർവ്വ നാണയങ്ങളും ആഭരണങ്ങളും രത്നങ്ങളും അടങ്ങുന്ന ഏഴ് കോടിയോളം രൂപ വിലമതിക്കുന്ന നിധി ശേഖരമാണ് മലനിരകളിൽ ഒളിച്ചു വച്ചത്. നിധിയിരിക്കുന്ന സ്ഥലം, എങ്ങനെ അവിടെയെത്താം തുടങ്ങിയ കാര്യങ്ങളിൽ സൂചന നൽകി 'ദ ത്രിൽ ഓഫ് ദ ചേസ്' എന്ന പേരിൽ ഒരു പുസ്തകവും പ്രസിദ്ധീകരിച്ചു. ഈ പുസ്തകത്തിലെ ഓരോ ചെറുകഥകളിലും നിധിയെ കുറിച്ചുള്ള സൂചനകളുണ്ട്. 'ഗോൾഡ് ആന്റ് മോർ' എന്ന 24 വരി കവിതയിൽ ഒമ്പത് സൂചനകളും ഉൾപ്പെടുത്തി. പുസ്തകം വായിച്ച് മൂന്നര ലക്ഷം നിധി വേട്ടക്കാരാണ് റോക്കി മലനിരകളിലെത്തിയത്.

മലയിൽ നിന്നു വീണും പരിക്കേറ്റും അഞ്ചു പേർ മരിച്ചു. ജനങ്ങളുടെ ജീവിതം അപകടത്തിലാക്കുന്ന നിധിവേട്ട അവസാനിപ്പിക്കണമെന്ന് ന്യൂമെക്സിക്കോയിലെ പൊലീസ് മേധാവി നിർദ്ദേശം നൽകിയിരുന്നു.

എന്നാൽ, ഫോറസ്​റ്റ് ഫെൻ പിന്മാറിയില്ല. നിധി ഒരാൾ കണ്ടെത്തിയെന്ന് 2020 ജൂണിൽ ഫോറസ്​റ്റ് ഫെൻ ലോകത്തെ അറിയിച്ചു. പക്ഷെ, വിജയിയുടെ പേര് വെളിപ്പെടുത്തിയില്ല. പേരു വിവരങ്ങൾ രഹസ്യമാക്കി വച്ച ഫോറസ്​റ്റ് 2020 സെപ്തംബറിൽ മരിക്കുകയും ചെയ്തു. ട്രഷർ ഹണ്ട് തട്ടിപ്പാണെന്ന പ്രചാരണം ശക്തമായിരിക്കെയാണ് വിജയി മിഷിഗണിലെ മെഡിക്കൽ വിദ്യാർത്ഥിയായ ജാക്ക് സ്​റ്റ്യുഫ് ആണെന്ന് ഔട്ട്‌സൈഡ് മാഗസിൻ കണ്ടെത്തിയത്. ഫോറസ്​റ്റ് ഫെന്നിന്റെ കുടുംബവും ഇത് സ്ഥിരീകരിച്ചിട്ടുണ്ട്.

വ്യോമിംഗ് സംസ്ഥാനത്തെ ഒരു മലയിൽ നിന്ന് ജൂൺ ആറിന് രാവിലെയാണ് നിധി കണ്ടെത്തിയതെന്ന് ജാക്ക് പറയുന്നു. ഉടൻ കാറെടുത്ത് ന്യൂമെക്സിക്കോയിൽ പോയി ഫോറസ്​റ്റ് ഫെന്നിനെ കണ്ട് വിവരമറിയിച്ചു.

നിധി വേട്ടക്കാർ ആക്രമിച്ചേക്കാമെന്നും തട്ടിക്കൊണ്ടു പോയേക്കാമെന്നും മുന്നറിയിപ്പ് നൽകിയ ഫോറസ്​റ്റ് ഫെൻ വിവരം രഹസ്യമാക്കി വയ്ക്കാൻ നിർദ്ദേശിക്കുകയായിരുന്നു. ഫെന്നിന്റെ കുടുംബത്തിന് നേരെ നിരവധി തവണ ആക്രമണങ്ങളുണ്ടായിട്ടുണ്ട്. നിധി എവിടെയായിരുന്നു, പുസ്തകത്തിലെ സൂചനകൾ എങ്ങനെയാണ് സഹായിച്ചത് തുടങ്ങിയ കാര്യങ്ങളൊന്നും ജാക്ക് വെളിപ്പെടുത്തിയിട്ടില്ല. ഫെന്നിന് ഏറെയിഷ്ടമുള്ള പ്രദേശത്തായിരുന്നു നിധിയെന്നും സ്ഥലം വെളിപ്പെടുത്തിയാൽ ജനക്കൂട്ടം അങ്ങോട്ടേയ്ക്ക് ഒഴുകുമെന്നും ജാക്ക് പറയുന്നു.

എന്തെങ്കിലും ബാക്കിയുണ്ടോ എന്നറിയാനും ആളുകൾ എത്തും. വിനോദസഞ്ചാരികൾക്ക് എത്താൻ കഴിയാത്ത പ്രദേശത്താണ് നിധിയുണ്ടായിരുന്നത്. അപകടം നിറഞ്ഞ വഴിയാണിതെന്നും ജാക്ക് പറയുന്നു. ന്യൂ മെക്സിക്കോയിലെ സുരക്ഷിത സ്ഥലത്താണ് ഇപ്പോൾ നിധി സൂക്ഷിച്ചിരിക്കുന്നത്. മെഡിക്കൽ വിദ്യഭ്യാസ വായ്പ അടയ്ക്കുന്നതിനായി നിധി വിൽക്കാനിരിക്കുകയാണെന്നും ജാക്ക് പറഞ്ഞു.

അതേസമയം, തന്റെ ഫോൺ വിവരങ്ങൾ ചോർത്തി ജാക്ക് നിധിയുടെ വിവരങ്ങൾ മോഷ്ടിച്ചുവെന്നാരോപിച്ച് ചിക്കാഗോയിലെ വക്കീലായ ബാർബറ ആൻഡേഴ്സൺ കോടതിയെ സമീപിച്ചിരിക്കുകയാണ്. പുസ്തകത്തിലെ കവിതകളും കഥകളും വായിച്ച് ഒരുപാട് വർഷമെടുത്താണ് നിധിയിരിക്കുന്നത് എവിടെയെന്ന് മനസിലാക്കിയത്. പക്ഷെ, ആരോ ഫോൺ ചോർത്തി വിവരങ്ങൾ കവർന്നുവെന്നാണ് കോടതിയിൽ നൽകിയ പരാതിയിൽ പറയുന്നത്. എന്നാൽ, നിധി കണ്ടെത്തിയത് ന്യൂമെക്സിക്കോയിൽ നിന്നല്ലെന്നും ബാർബറയെ പരിചയമില്ലെന്നുമാണ് ജാക്കി പറയുന്നത്.