ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം ഏഴ് കോടി ഇരുപത് ലക്ഷം കടന്നു. ആറ് ലക്ഷത്തിലധികം പേർക്കാണ് പുതുതായി വൈറസ് ബാധ സ്ഥിരീകരിച്ചത്. വേൾഡോമീറ്ററിന്റെ കണക്കുപ്രകാരം മരണസംഖ്യ 16,10,771 ആയി ഉയർന്നു. രോഗമുക്തി നേടിയവരുടെ എണ്ണം അഞ്ച് കോടി പിന്നിട്ടു എന്നത് ആശ്വാസം നൽകുന്നു. അമേരിക്ക, ഇന്ത്യ, ബ്രസീൽ,റഷ്യ തുടങ്ങിയ രാജ്യങ്ങളിൽ ഇപ്പോഴും രോഗവ്യാപനം രൂക്ഷമായി തുടരുകയാണ്.

രോഗികളുടെ എണ്ണത്തിലും മരണസംഖ്യയിലും ലോകത്ത് അമേരിക്കയാണ് ഒന്നാമത്. രാജ്യത്ത് രണ്ട് ലക്ഷത്തിലധികം പുതിയ കേസുകളാണ് റിപ്പോർട്ട് ചെയ്തത്. ഇതോടെ രോഗബാധിതരുടെ എണ്ണം ഒരു കോടി അറുപത്തിയഞ്ച് ലക്ഷം കടന്നു.മരണസംഖ്യ മൂന്ന് ലക്ഷം പിന്നിട്ടു. തൊണ്ണൂറ്റിയാറ് ലക്ഷം പേർ സുഖം പ്രാപിച്ചു.

ഇന്ത്യയിൽ കൊവിഡ് ബാധിതരുടെ എണ്ണം 98.50 ലക്ഷവും, മരണം 1.43 ലക്ഷവും പിന്നിട്ടു. കഴിഞ്ഞ ഒരാഴ്ചയായി പ്രതിദിന മരണം 500ൽ താഴെയാണെന്ന് കേന്ദ്ര ആരോഗ്യമന്ത്രാലയം അറിയിച്ചു. ചികിത്സയിലുള്ളവരുടെ എണ്ണം 3.6 ലക്ഷത്തിന് താഴെയാണ്. ഇത് ആകെ രോഗികളുടെ 3.66 ശതമാനം മാത്രമാണ്. ആകെ രോഗമുക്തരുടെ എണ്ണം 93 ലക്ഷം കടന്നു. രോഗമുക്തി നിരക്ക് 94.89 ശതമാനമായി വർദ്ധിച്ചു.

ബ്രസീലിൽ അറുപത്തിയെട്ട് ലക്ഷം പേർക്കാണ് കൊവിഡ് സ്ഥിരീകരിച്ചത്. 1,81,143 പേർ മരിച്ചു.രോഗമുക്തി നേടിയവരുടെ എണ്ണം അമ്പത്തിയൊമ്പത് ലക്ഷം പിന്നിട്ടു. റഷ്യയിൽ ഇരുപത്തിയാറ് ലക്ഷം രോഗബാധിതരാണ് ഉള്ളത്. രോഗികളുടെ എണ്ണത്തിൽ തൊട്ടുപിന്നിൽ ഫ്രാൻസാണ്. രാജ്യത്ത് ഇരുപത്തി മൂന്ന് ലക്ഷം പേർക്കാണ് വൈറസ് ബാധ സ്ഥിരീകരിച്ചത്.