മുഖം കഴുകിയാൽ പൗഡർ ഇടണമെന്ന് നിർബന്ധമുള്ളവരാണ് മിക്ക മലയാളികളും. മുഖചർമ്മത്തിലും ശരീരത്തിലും കാണപ്പെടുന്ന കുത്തുകളും പാടുകളും മാറ്റി മുഖവും മേനിയും മിനുക്കൽ മാത്രമല്ല, പൗഡർ ചർമ്മത്തിന് ചെറിയതോതിൽ മൃദുത്വവും നൽകുന്നുണ്ട്. അമിതവിയർപ്പുള്ളവ‌ർ കക്ഷത്തിലും മറ്റും പൗഡറിടുന്നത് ഏറെ പ്രയോജനകരമാണ്. തുടകൾ തമ്മിൽ ഉരഞ്ഞു പൊട്ടുന്നവർക്കും കക്ഷത്ത് വിയർപ്പ് ഗന്ധം ഉള്ളവർക്കും ടാൽക്കം പൗഡർ ഗുണം ചെയ്യും. ടാൽക്ക് ആണ് പൗഡറിലെ പ്രധാന ചേരുവ. പൗഡറിലെ മാഗ്നീഷ്യം കാർബണേറ്റാണ് എണ്ണമയം ഒപ്പിയെടുക്കുന്ന വസ്തു. ടൈറ്റാനിയം ഡയോക്സൈഡ്, സിങ്ക് ഓക്സൈഡ്, സ്റ്റാർച്ച് പ്രസിപ്പിറ്റേറ്റഡ് ചോക്ക് ഇവ വിയർപ്പും എണ്ണമയവും വലിച്ചെടുക്കുന്നു. കോൺസിൽക്കോ റോസിൽക്കോ ആകും സുഗന്ധത്തിനായി ചേർക്കുക. മുഖത്ത് മാത്രം ഇടാൻ നിറം ചേർത്ത കംപ്രസ്ഡ് പൗഡറും ലൂസ് പൗഡറും ഉണ്ട്. ആന്റിഫംഗൽ മരുന്നുകളായ ക്ലോട്രെമസോൾ, മൈക്കനസോൾ എന്നിവചേർത്തുണ്ടാക്കുന്ന മരുന്നുകളുമുണ്ട്. ബേബിപൗഡറിൽ സുഗന്ധത്തിനായി അല്‌പം ആരോമ ഓയിലും ഉപയോഗിക്കുന്നുണ്ട്. അതായാത്, കെമിക്കലുകൾ തന്നെയാണ് പൗഡറിന്റെ അടിസ്ഥാനം. ഇതൊക്കെയായതു കൊണ്ട് തന്നെ പൗഡർ ഉപയോഗിക്കുമ്പോൾ നമ്മൾ ശ്രദ്ധിക്കേണ്ട ചില കാര്യങ്ങളുണ്ട്.
പൗഡർ ഒരിക്കലും ശരീരത്ത് നേരിട്ട് കുടഞ്ഞിടരുത്. കുടഞ്ഞിടുമ്പോൾ പാറിപ്പറക്കുന്ന കെമിക്കലുകൾ ശ്വാസനാളിയിൽ കടന്ന് ശ്വാസകോശരോഗങ്ങൾ ഉണ്ടാക്കാം. പൗഡർ കൈകൊണ്ട് എടുത്ത് തേയ്‌ക്കുന്നതാണ് ഉത്തമം.
പൗഡർ ഉപയോഗിക്കുമ്പോൾ മുഖത്ത് ചെറിയ കുരുക്കൾ ഉണ്ടാകുന്നുണ്ടെങ്കിൽ അവ അലർജിയാണ്. ഒഴിവാക്കുക. അത് ത്വക്കിലുണ്ടാക്കുന്ന കോൺടാക്‌ട് അലർജിയും ഫോട്ടോ കെമിക്കൽ അലർജിയും കൊണ്ടാകാം.
കുഞ്ഞുങ്ങളെ ശരീരമാസകലം പൗഡറിൽ കുളിപ്പിക്കാതെ ശരീരമടക്കുകളിൽ മാത്രം പൗഡർ ഇടുന്നതാണ് നല്ലത്.
രാസവസ്‌തുക്കൾ ചേരാത്ത പൗഡർ വീട്ടിലുണ്ടാക്കാം. കോൺസ്റ്രാർച്ച് പൗഡറും ആരോറൂട്ട് പൗഡറും കൂട്ടികലർത്തി ഒരു തുള്ളി ലാവൻഡർ/ കമോമിൽ ആരോമ ഓയിലുകൾ ചേർത്ത് ബേബി പൗഡർ ഉണ്ടാക്കാം. ഇതിൽ അലർജി ഉണ്ടാകുമെന്ന് പേടിക്കാനില്ല.
പൊട്ട്തൊടുന്നത് മുഖസൗന്ദര്യത്തിന് പൂർണത നൽകുമെന്നാണ് സൗന്ദര്യസങ്കല്‌പം. ചിലർ സൗന്ദര്യവസ്‌തുവായി കാണുമ്പോൾ മറ്റുചിലർ സൗഭാഗ്യത്തിന്റെയും സമൃദ്ധിയുടെയും പ്രതീകമായിട്ടാണ് കാണുന്നത്. എന്തായാലും പൊട്ടുതൊടുമ്പോൾ താഴെ പറയുന്ന കാര്യങ്ങൾകൂടി ഇനി ശ്രദ്ധിക്കുക.
ഓവൽ ഷേപ്പിലുള്ള മുഖത്തിന് ഇടത്തരം നീളമുള്ള പൊട്ടാണ് അനുയോജ്യം. വട്ട മുഖമുള്ളവർ നീളമുള്ള പൊട്ടുകൾ അണിയുന്നത് മുഖം നീണ്ടതായി തോന്നിപ്പിക്കും.
ചതുരാകൃതിയിലുള്ള മുഖത്തിന് ഓവൽ ഷേപ്പിലുള്ള പൊട്ട് ചേരില്ല. ഇത്തരം മുഖങ്ങൾക്ക് വട്ടത്തിലോ ചെറുതോ ആയ പൊട്ടാണ് ചേരുക.
പൊട്ട് നിർമ്മാണത്തിൽ രാസവസ്‌തുക്കൾ ഉപയോഗിക്കുന്നതിനാൽ സ്‌കിൻ അല‌ർജിയുള്ളവർ അത്തരം പൊട്ടുകൾ പൂർണമായും ഒഴിവാക്കണം.
ടാറ്റൂ രൂപത്തിൽ ഉപയോഗിക്കുന്ന പൊട്ടുകൾ ഇന്ന് വിപണിയിൽ ലഭ്യമാണ്. ഇവ അനുകരിക്കാൻ ശ്രമിക്കാതെ ഒരു ബ്യൂട്ടി തെറാപ്പിസ്റ്റിന്റെ അഭിപ്രായം ആരാഞ്ഞശേഷം മാത്രം ഉപയോഗിക്കുക.
നിങ്ങളുടെ മുഖത്തിനിണങ്ങിയ തരത്തിലും നിറത്തിലുമുള്ള പൊട്ട് ഏതാണെന്ന് പരിചയസമ്പന്നയായ ബ്യൂട്ടിതെറാപ്പിസ്റ്റിന് നിർദ്ദേശിക്കാനാവും.
തണുപ്പ് കാലത്ത് കട്ട് വർക്ക് ഉള്ളതോ ലൈറ്റ് നിറമുള്ളതോ ആയ പൊട്ടുകൾ ഉപയോഗിക്കുക. മുഖത്തിന് ചന്തം കൂട്ടുന്നത് മുഖത്തിനിണങ്ങിയ പൊട്ട് തന്നെയാണ്.
