തൃശൂർ: കന്യാസ്ത്രീയെ പീഡിപ്പിച്ചെന്ന കേസിൽ പ്രതിയായി വിചാരണ നേരിടുന്ന ബിഷപ്പ് ഫ്രാങ്കോ മുളയ്‌ക്കലിന്റെ ഫോട്ടോയുമായി കാത്തോലിക്ക സഭയുടെ കലണ്ടർ. തൃശൂർ അതിരൂപത അച്ചടിച്ച പുതിയ കലണ്ടറിലാണ് ഫ്രാങ്കോ മുളയ്‌ക്കലിന്റെ ചിത്രമുളളത്. ചിത്രത്തിനൊപ്പം ജന്മദിനവും പ്രാധാന്യത്തോടെയാണ് നൽകിയിരിക്കുന്നത്.

കലണ്ടറിൽ മാർച്ച് മാസത്തിലെ പേജിലാണ് പീഡനക്കേസ് പ്രതിയായ ബിഷപ്പിന്റെ ഫോട്ടോ പ്രസിദ്ധീകരിച്ചിരിക്കുന്നത്. മാർച്ച് 25നാണ് ബിഷപ്പിന്റെ ജന്മദിനമെന്നും ചിത്രത്തോടൊപ്പം നൽകിയ അടിക്കുറിപ്പിൽ പറയുന്നു. ഫ്രാങ്കോയുടെ ചിത്രം ഉൾപ്പെടുത്തിയ കലണ്ടർ സമൂഹമാദ്ധ്യമങ്ങളിലും മറ്റും വൈറലായെങ്കിലും ഇതിൽ അസാധാരണമായി ഒന്നുമില്ലെന്ന നിലപാടിലാണ് കത്തോലിക്ക സഭ.

പീഡനക്കേസിൽ പ്രതിയായ ഉന്നതവൈദികന്റെ ചിത്രം കലണ്ടറിൽ ഉൾപ്പെടുത്തിയത് സ്വാഭാവിക നടപടി മാത്രമാണ്. ഫ്രാങ്കോ ഇപ്പോഴും ബിഷപ്പ് സ്ഥാനത്ത് തുടരുന്നുണ്ടെന്നും അദ്ദേഹത്തിനെതിരായ കുറ്റങ്ങളൊന്നും കോടതിയിൽ തെളിയിക്കപ്പെട്ടിട്ടില്ലെന്നുമാണ് കത്തോലിക്ക സഭ നൽകുന്ന വിശദീകരണം.