കഴിഞ്ഞ പതിനഞ്ച് വർഷമായി കൂടെയുണ്ടായിരുന്ന പ്രിയപ്പെട്ട ഡയമണ്ട് കമ്മൽ നഷ്‌ടമായതിന്റെ സങ്കടത്തിലാണ് നടി ജൂഹിചൗള.മുംബൈ വിമാനത്താവളത്തിൽ വച്ചായിരുന്നു താരത്തിന്റെ കമ്മൽ നഷ്‌ടപ്പെട്ടത്. ആഭരണം തിരികെ ലഭിക്കാൻ ആരാധകരുടെ സഹായവും തേടി ഒരു ട്വീറ്റും നടി പങ്കുവച്ചു. 'ഇന്ന് രാവിലെ മുംബൈ എയർപോട്ടിലെ ഗെയിറ്റ് 8 ന് സമീപത്തേക്ക് നടക്കുന്നതിനിടയിൽ എമിറേറ്റ്സ് കൗണ്ടറിന് സമീപത്തു എവിടെയോ എന്റെ ഡയമണ്ട് കമ്മൽ നഷ്‌ടമായി. അത് കണ്ടെത്താൻ ആരെങ്കിലും സഹായിച്ചാൽ ഞാൻ വളരെ സന്തോഷവതിയാകും. കമ്മൽ കിട്ടിയാൽ പൊലീസിനെ അറിയിക്കൂ. നിങ്ങൾക്ക് സമ്മാനം തരുന്നതിൽ എനിക്ക് സന്തോഷമേ ഉള്ളൂ. കഴിഞ്ഞ 15 വർഷമായി സ്ഥിരം അണിയാറുള്ള കമ്മലാണ് നഷ്‌ടമായിരിക്കുന്നത്. അത് കണ്ടെത്താൻ എന്നെ സഹായിക്കൂ." ഇതായിരുന്നു താരത്തിന്റെ കുറിപ്പ്. കമ്മലിന്റെ ചിത്രവും താരം പങ്കുവച്ചിട്ടുണ്ട്.