വാഷിംഗ്ടൺ: ഇന്ത്യൻ പ്രധാനമന്ത്രി നരേന്ദ്ര മോദിക്കും ആഭ്യന്തര മന്ത്രി അമിത് ഷായ്ക്കുമെതിരെ ഫയൽ ചെയ്ത 100 മില്യൺ (10 കോടി) ഡോളറിന്റെ കേസ് തള്ളി യു.എസ് കോടതി. ഹർജി നൽകിയ കാശ്‌മീർ ഖലിസ്ഥാൻ റഫറണ്ടം ഫ്രണ്ടും മറ്റു രണ്ടു കക്ഷികളും തുടർച്ചയായി രണ്ടു ഹിയറിംഗിനും ഹാജരാകാത്തതിനെ തുടർന്നാണ് ടെക്സസിലെ സതേൺ ഡിസ്ട്രിക്ട് കോടതി ജഡ്ജി ഫ്രാൻസസ് എച്ച്. സ്റ്റാസിയുടെ നടപടി. ജമ്മു കാശ്‌മീരിന്റെ പ്രത്യേക പദവി റദ്ദാക്കിയതിനെതിരെ ആയിരുന്നു ഹർജി.

ടെക്സസിലെ ഹൂസ്റ്റണിൽ മോദിയുടെ 'ഹൗഡി മോദി' പരിപാടി നടക്കുന്നതിനു ദിവസങ്ങൾക്ക് മുമ്പ് 2019 സെപ്തംബർ 19നാണു ഹർജി ഫയൽ ചെയ്തത്. ജമ്മു കശ്മീരിന്റെ പ്രത്യേക പദവി റദ്ദാക്കിയ പാർലമെന്റ് തീരുമാനം പിൻവലിക്കണമെന്നും നഷ്ടപരിഹാരമായി 100 മില്യൺ ഡോളർ നൽകണമെന്നുമായിരുന്നു ആവശ്യം. മോദിയും ഷായും കൂടാതെ, ലഫ്. ജനറൽ കൻവാൾ ജീത്ത് സിംഗ് ധില്ലനെയും കേസിൽ ഉൾപ്പെടുത്തിയിരുന്നു. നിലവിൽ ഡിഫൻസ് ഇന്റലിജൻസ് ഏജൻസിയുടെ ഡയറക്ടർ ജനറലായ ധില്ലൻ, ഇന്റഗ്രേറ്റഡ് ഡിഫൻസ് സ്റ്റാഫിന്റെ ഡെപ്യൂട്ടി ചീഫുമാണ്.

കശ്മീർ ഖലിസ്ഥാൻ റഫറണ്ടം ഫ്രണ്ടിനെ കൂടാതെ ഹർജി നൽകിയ മറ്റു രണ്ടു കക്ഷികൾ ആരെന്നു വ്യക്തമല്ല.