ന്യൂഡൽഹി: ഒരു ഇന്ത്യക്കാരനും മറക്കാനാകാത്ത ദിവസമാണ് 1971 ഡിസംബർ 16. പാകിസ്ഥാനെതിരെ നടന്ന ബംഗ്ലാദേശ് യുദ്ധത്തിൽ ഇന്ത്യൻ സേനയും ഗറില്ലാ പോരാളികളുടെ സംഘമായ ‘മുക്തി ബഹിനി’യും ചേർന്ന് വിജയകൊടി പാറിച്ച ദിനം. യുദ്ധത്തിൽ നിരവധി ഇന്ത്യൻ സെെനികർ വീരമ‌ൃത്യുവരിച്ചിരുന്നു.

ഇവർക്ക് ആദരവ് അർപ്പിച്ച് കൊണ്ട് അതിർത്തി സുരക്ഷാ സേനയിലെ സ്ത്രീകളും പുരുഷന്മാരും
അതിർത്തിയോട് ചേർന്ന് അർദ്ധരാത്രി 180 കിലോമീറ്റർ ദൂരം റിലേ ഓട്ടം നടത്തി. 11 മണിക്കൂറുകൾ കൊണ്ടാണ് സേന അംഗങ്ങൾ റിലേ പൂർത്തിയാക്കിയത്.

1971ലെ യുദ്ധത്തിൽ മരിച്ച ധീര സെെനികരെ ആദരിച്ചുകൊണ്ട് ബംഗ്ലാദേശ് ഒരു സ്‌മാരകം പണിയുമെന്ന വാ‌ർത്ത നേരത്തെ ന്യൂ ഇന്ത്യൻ എക്സ്പ്രസ് റിപ്പോർട്ട് ചെയ്യ്തിരുന്നു.

പടിഞ്ഞാറൻ പാകിസ്ഥാൻ (നിലവിലെ പാകിസ്ഥാൻ) സൈന്യം 1971 മാർച്ച് 25 ന് കിഴക്കൻ പാകിസ്ഥാനിലെ(നിലവിലെ ബംഗ്ലാദേശ്) ബംഗാളി ദേശീയ പ്രസ്ഥാനത്തെ ഇല്ലായ്‌മ ചെയ്യുന്നതിനായി ഓപ്പറേഷൻ സെർച്ച്‌ലൈറ്റ് ആരംഭിച്ചതാണ് ബംഗ്ലാദേശ് വിമോചനയുദ്ധത്തിന് തുടക്കം കുറിച്ചത്.

ഇത് ഇന്ത്യ-പാകിസ്ഥാൻ യുദ്ധത്തിന് കാരണമായി.ഡിസംബർ 3ന് ആരംഭിച്ച യുദ്ധം 13 ദിവസമാണ് നീണ്ടും നിന്നത്. ഒടുവിൽ ഡിസംബർ 16ന് ഇന്ത്യൻ സേനയ്ക്ക് മുന്നിൽ മുട്ടുമടക്കിയ പാകിസ്ഥാൻ തോൽവി സമ്മതിക്കുകയായിരുന്നു.