പത്തനംതിട്ട: നടി അനുശ്രീ പ്രചാരണത്തിനിറങ്ങിയ വാര്‍ഡില്‍ യുഡിഎഫ് സ്ഥാനാര്‍ഥിയ്ക്ക് തോല്‍വി. ചെന്നീര്‍ക്കര പഞ്ചായത്തിലെ 12ാം വാര്‍ഡിലാണ് കോണ്‍ഗ്രസ് സ്ഥാനാര്‍ഥി റിനോയ് വര്‍ഗീസാണ് പരാജയപ്പെട്ടത്. എല്‍ഡിഎഫ് സ്ഥാനാര്‍ഥി സിപിഎമ്മിന്റെ എം ആര്‍ മധുവാണ് ചെന്നീര്‍ക്കര പഞ്ചായത്തിലെ 12ാം വാര്‍ഡില്‍ വിജയിച്ചത്.
11 വോട്ടിനാണ് എൽഡിഎഫ് ഇവിടെ വിജയം സ്വന്തമാക്കിയത്. മധു 411 വോട്ടുകള്‍ നേടി. സ്വതന്ത്രനായി മത്സരിച്ച രഞ്ജന്‍ പുത്തന്‍പുരയ്ക്കല്‍ 400 വോട്ടുകള്‍ നേടി രണ്ടാമതായി. യുഡിഎഫ് സ്ഥാനാര്‍ഥിയായ റിനോയ് വര്‍ഗീസിന് വെറും 132 വോട്ടുകള്‍ മാത്രമാണ് നേടാനായത്. ബിജെപിയുടെ ആര്‍ പ്രമോദ് 13 വോട്ടുകളും നേടി. റിനോയ് വര്‍ഗീസിന്റെയും ബ്ലോക്ക്, ജില്ലാ പഞ്ചായത്ത് ഡിവിഷനുകളിലെ യുഡിഎഫ് സ്ഥാനാര്‍ഥികളുടെയും പ്രചരണത്തിന്റെ ഭാഗമായി സംഘടിപ്പിച്ച കുടുംബസംഗമത്തിലാണ് അനുശ്രീ പങ്കെടുത്തത്. നടി പ്രചാരണത്തിനെത്തിയത് ആത്മവിശ്വാസം കൂടിയതായി യുഡിഎഫ് കേന്ദ്രങ്ങൾ അഭിപ്രായപ്പെട്ടിരുന്നു.
വാര്‍ഡിലെ കോണ്‍ഗ്രസ് കുടുംബസംഗമത്തില്‍ പങ്കെടുത്ത് സംസാരിച്ച നടി ആരാധകര്‍ക്കൊപ്പം സെല്‍ഫിയുമെടുത്താണ് അന്ന് മടങ്ങിയത്. റിനോയ് വിജയിച്ചു കഴിഞ്ഞാല്‍ നാട്ടുകാര്‍ക്ക് ചെയ്തുകൊടുക്കേണ്ടതെല്ലാം ചെയ്യുമെന്ന് തനിക്ക് പൂര്‍ണവിശ്വാസമുണ്ടെന്നും അതിനാലാണ് അദ്ദേഹത്തെ പിന്തുണച്ച് പ്രചാരണത്തിന് ഇറങ്ങിയതെന്നും അനുശ്രീ പറഞ്ഞിരുന്നു.