കൊച്ചി: തദ്ദേശ തിരഞ്ഞെടുപ്പ് വിജയത്തിൽ ഇടതുപക്ഷ ജനാധിപത്യ മുന്നണി ആവശ്യത്തിലധികം ആഹ്ലാദിച്ചാൽ നിയമസഭാ തിരഞ്ഞെടുപ്പിൽ എൽ.ഡി.എഫ് 'മൂക്കുംകുത്തി വീഴുമെന്ന്' സംവിധായകൻ അരുൺ ഗോപി. ഒരു സ്വകാര്യ മലയാളം വാർത്താചാനലിനോടാണ് അദ്ദേഹം ഈ പ്രതികരണം നടത്തിയത്.

'ഞാൻ ഇടതുപക്ഷ അനുഭാവിയാണ്. യഥാർഥത്തിൽ ഇപ്പോൾ നടക്കുന്ന ഭരണത്തോട് വിയോജിപ്പ് ഉണ്ട്. ഈ രീതിയിൽ പോയാൽ കമ്മ്യൂണിസ്റ്റ് പാർട്ടി ഇല്ലാതാകുന്ന ഒരു സാഹചര്യം ഉണ്ടാകും. തദ്ദേശ തെരഞ്ഞെടുപ്പിലെ വിജയത്തിൽ വല്യ വീരവാദം പറഞ്ഞുകൊണ്ട് നടന്നാൽ അടുത്ത നിയമസഭാ തെരെഞ്ഞെടുപ്പിൽ എൽഡിഎഫ് മൂക്കുംകുത്തി വീഴും.'-അരുൺ ഗോപി പറയുന്നു.

പ്രതിപക്ഷ പാർട്ടികൾക്ക് കഴിവില്ലാത്തതുക്കൊണ്ടാണ് എൽഡിഎഫ് വിജയിച്ചതെന്നും അരുൺ വിലയിരുത്തി. രാഷ്ട്രീയ അന്തരീക്ഷം പ്രതിപക്ഷ പാർട്ടികൾക്ക് അനുകൂലമായിരുന്നുവെങ്കിലും അത് വേണ്ടവിധം മുതലെടുക്കാൻ അവർക്ക് കഴിഞ്ഞിരുന്നില്ലെന്നും അരുൺ ഗോപി അഭിപ്രായപ്പെട്ടു.

അതേസമയം അഴിമതി ആരോപണം യു.ഡി.എഫിന് എതിരായാണ് വന്നിരുന്നതെങ്കിൽ അത് എൽ.ഡി.എഫ് മികച്ച രീതിയിൽ ഉപയോഗിക്കുമായിരുന്നുവെന്നും സംവിധായകൻ പറയുന്നു. ലോക്സഭാ തിരഞ്ഞെടുപ്പിൽ എൽ.ഡി.എഫ് തോറ്റതാണെന്നും പ്രധാന തിരഞ്ഞെടുപ്പുകളിൽ മത്സരിക്കാൻ മുന്നണി പാകപ്പെട്ടതായി തനിക്ക് തോന്നുന്നില്ലെന്നും സംവിധായകൻ പറഞ്ഞു.