മനുഷ്യന് എന്നും ഗൃഹാതുരത്വമുണർത്തുന്ന ഘടകങ്ങളിൽ ഒന്നാണ് ആഹാരം. വിഭവങ്ങളിൽ ചിലത് തലമുറകൾ കൈമാറി നിലനിൽക്കുമ്പോൾ മ‌റ്റുചിലത് കാലക്രമേണ നശിച്ചുപോകും. പ്രിയപ്പെട്ടവരുണ്ടാക്കി തരുന്ന അത്തരം ഭക്ഷണം കഴിക്കാനായെങ്കിൽ എന്ന് നാം പലപ്പോഴും ആശിച്ചുപോയിട്ടുമുണ്ടാകും. ഇത്തരത്തിൽ ഒരു മകന് ലഭിച്ച അസുലഭ ഭാഗ്യമാണ് ഇവിടെ പറയാൻ പോകുന്നത്. സമൂഹമാദ്ധ്യമങ്ങളിൽ വൈറലായ ഒരു സംഭവമാണിത്.

വ്യത്യസ്‌തമായ ആഹാരങ്ങളെ കുറിച്ച് കുറിപ്പുകൾ തയ്യാറാക്കാറുള‌ള എറിക് കിം ആണ് ഈ കൗതുകകരമായ വിവരം സമൂഹമാദ്ധ്യമങ്ങളിൽ പങ്കുവച്ചത്. തന്റെ മുത്തശ്ശി, അച്ഛന് തയ്യാറാക്കി സൂക്ഷിച്ചുവച്ചിരുന്ന ഒരു ഭക്ഷണം മുത്തശ്ശിയുടെ മരണശേഷം പത്ത് കൊല്ലം കഴിഞ്ഞ് അമ്മ എടുത്തുനൽകി. ഗൊചുജാംഗ് എന്ന പ്രത്യക ഭക്ഷണമാണ് അച്ഛന് ഇങ്ങനെ അമ്മ നൽകിയത്. ഇത്രയധികം നാൾ ഫ്രിഡ്‌ജിലെ ബേസ്‌മെൻറ് ഫ്രീസറിൽ സൂക്ഷിച്ചിരിക്കുകയായിരുന്നു ഈ വിഭവം.എന്നെങ്കിലും ഒരുനാൾ അച്ഛന് സർപ്രൈസ് നൽകാൻ തീരുമാനിച്ചായിരുന്നു അമ്മ അങ്ങനെ ചെയ്‌തത്.

ഭക്ഷണ പാത്രം തുറക്കുന്നതും വിളമ്പുന്നതും ട്വി‌റ്ററിൽ ഷെയർ ചെയ്‌ത വീഡിയോയിലുണ്ട്.രാത്രി ഭക്ഷണത്തിനൊപ്പം ഗൊചുജാംഗ് വിളമ്പിയത് കഴിച്ച അച്ഛന് സന്തോഷമായി. തന്റെ അമ്മയുടെ ആഹാരത്തെ കുറിച്ച് അന്ന് മുഴുവൻ അച്ഛൻ സന്തോഷത്തോടെ പറഞ്ഞുകൊണ്ടിരുന്നുവെ ന്നാണ് കിം പോസ്‌റ്റിൽ കുറിച്ചത്. എരിവും പുളിപ്പും ചേർന്ന പുളിപ്പിച്ച മുളക് പേസ്‌റ്റാണ് ഗൊചുജാംഗ്. മുത്തശ്ശിയുണ്ടാക്കുന്ന ഗൊചുജാംഗിന് അധികം മധുരം പതിവില്ല അത് അരിയാഹാരത്തോടൊപ്പം കഴിക്കുമ്പോൾ നല്ല സ്വാദുണ്ടാകുമെന്ന് വിഭവം തിരിച്ചറിഞ്ഞ കിമ്മിന്റെ അച്ഛൻ പറഞ്ഞു. ഇനി ലഭിക്കില്ലെന്ന് കരുതിയ തന്റെ അമ്മയുടെ വിഭവം കഴിക്കാനൊത്ത അച്ഛന് വലിയ സന്തോഷമായെന്ന് കിം പറയുന്നു.

This is a batch of gochujang my grandmother made before she passed away 10 yrs ago. My mom calls it a time capsule. She’s kept it in the basement freezer all these years and wanted to surprise my dad with it one day. So one day, a few weeks ago, my mom brought it out for dinner. pic.twitter.com/7Vukdwnw8a

— Eric Kim (@ericjoonho) December 11, 2020