തിരുവനന്തപുരം: സംസ്ഥാനത്ത് ജനുവരി ഒന്ന് മുതൽ മുഴുവൻ കെ എസ് ആർ ടി സി ബസുകളും സർവീസ് നടത്തുമെന്ന് ഗതാഗത മന്ത്രി എ കെ ശശീന്ദ്രൻ. കട്ടപ്പുറത്തുളള മുഴുവൻ ബസുകളും നിരത്തിലിറക്കാനുളള നടപടി സ്വീകരിച്ചിട്ടുണ്ടെന്നും ഗതാഗതമന്ത്രി പറഞ്ഞു.

ലോക്ക്‌ഡൗണിനെ തുടർന്നായിരുന്നു കെ എസ് ആർ ടി സി സർവീസുകൾ ഭാഗികമായി കുറച്ചത്. കെ എസ് ആർ ടി സി ബസുകളിൽ പതിനഞ്ചുവരെ ആളുകൾക്ക് നിന്ന് യാത്ര ചെയ്യാൻ അനുമതി നൽകിയിട്ടുണ്ട്. കൊവിഡ് മാനദണ്ഡം പാലിക്കേണ്ടതിനാൽ നിന്നുളള യാത്രക്ക് ഇതുവരെ അനുമതി ഉണ്ടായിരുന്നില്ല.

അതേസമയം, ക്രിസ്‌തുമസ് പുതുവത്സരത്തോടനുബന്ധിച്ച് കെ എസ് ആർ ടി സി പ്രത്യേക അന്തർ സംസ്ഥാന സർവീസുകൾ നടത്തും. ഡിസംബർ 21 മുതൽ ജനുവരി 4 വരെ, കേരളത്തിലെ വിവിധ കേന്ദ്രങ്ങിൽ നിന്ന് ബംഗളൂരിലേക്കും തിരിച്ചുമായിരിക്കും സർവീസ്.