തിരുവനന്തപുരം: തദ്ദേശ തിരഞ്ഞെടുപ്പിൽ യു ഡി എഫ് ഒലിച്ചുപോയിയെന്ന് പറയാനാവില്ലെന്നും എന്നാലും ഇതൊന്നുമായിരുന്നില്ല തങ്ങൾ പ്രതീക്ഷിച്ചിരുന്നതെന്നും ആർ എസ് പി നേതാവ് ഷിബു ബേബി ജോൺ. പൊതുജനവികാരം സർക്കാരിന് എതിരായിരുന്നുവെന്നും അദ്ദേഹം മാദ്ധ്യമങ്ങളോട് പറഞ്ഞു.

മുന്നണിയുടെ രീതിയോട് ശക്തമായ പ്രതിഷേധവും അമർഷവും ആർ എസ് പിക്കുണ്ട്. ഏതെങ്കിലും വ്യക്തിയുടെ പോരായ്‌മയായി അത് കണക്കാക്കുന്നില്ല. ഒരു വ്യക്തി വിചാരിച്ചാൽ മെച്ചപ്പെടാനും പോകുന്നില്ല. അതിനപ്പുറത്തേക്ക് രാഷ്ട്രീയത്തെ ഗൗരവമായി യു ഡി എഫ് കൈകാര്യം ചെയ്യുന്നുവെന്ന് ജനങ്ങൾക്ക് ബോദ്ധ്യപ്പെടണമെന്നും ഷിബു ബേബി ജോൺ വ്യക്തമാക്കി.

എൽ ഡി എഫ് വിരുദ്ധ വോട്ടുകൾ പോയത് ബി ജെ പിയിലേക്കാണെന്നത് വസ്‌‌തുതയാണ്. നിയമസഭയിൽ ഇതേ ഫലമാകുമെന്ന് ഞങ്ങൾ ചിന്തിക്കുന്നില്ല. എൽ ഡി എഫിനെ അധികാരത്തിൽ നിന്ന് മാറ്റണമെങ്കിൽ യു ഡി എഫിനേ സാധിക്കൂ. ബി ജെ പിക്ക് ആ തരത്തിലുളള വളർച്ച ഒരിക്കലും കേരളത്തിലുണ്ടാകാൻ പോകുന്നില്ലെന്നും അദ്ദേഹം പറഞ്ഞു.

തിരിച്ചടികളിൽ നിന്ന് കോൺഗ്രസ് പാഠം പഠിക്കാറില്ല. തങ്ങളുടെ അതൃപ്‌തി കോൺഗ്രസ് നേതൃത്വത്തെ അറിയിക്കും. തോൽവിക്ക് കാരണമായി ഒരുപാട് ഘടകങ്ങളുണ്ട്. ഇപ്പോൾ അത് പരസ്യമാക്കാനില്ല. കോൺഗ്രസിന്റെ പ്രതികരണം വന്ന ശേഷം അതുസംബന്ധിച്ച് നോക്കാമെന്നും അദ്ദേഹം വ്യക്തമാക്കി.