വാഷിംഗ്​ടൺ: നിയുക്ത അമേരിക്കൻ പ്രസിഡന്റ് ജോ ബൈഡനും ഭാര്യ ജിൽ ബൈഡനും നാളെ കൊവിഡ്​ വാക്​സിൻ​ സ്വീകരിക്കും. അതേസമയം, നിയുക്ത വൈസ്​ പ്രസിഡന്റ് കമല ഹാരിസും ഭർത്താവ് ഡഗ്ലസ് എംഹോഫും ഒരാഴ്ചക്ക്​ ശേഷമാകും വാക്​സിൻ സ്വീകരിക്കുക. ബൈഡന്റെ പ്രസ്​ സെക്രട്ടറി ജെൻ സാക്കിയാണ് ഇത് സംബന്ധിച്ച വിവരങ്ങൾ പുറത്തുവിട്ടത്. വാക്​സിൻ കുത്തിവയ്പ് നൽകുന്ന ​ഡെലവയർ മെഡിക്കൽ കേന്ദ്രത്തിലെ ആരോഗ്യ പ്രവർത്തകർക്ക്​ ബൈഡൻ നന്ദി അറിയിക്കുകയും ചെയ്യും. '​ വാക്​സിൻ ലഭിക്കുന്നവരുടെ മുൻനിരയിൽ ഇടം പിടിക്കാൻ എനിക്ക്​ ആഗ്രഹമില്ല. എന്നാൽ വാക്​സിൻ സുരക്ഷിതമാണെന്ന്​ ജനങ്ങൾക്ക്​ ഉറപ്പുനൽകാൻ വാക്​സിൻ സ്വീകരിക്കും' -ബൈഡൻ പറഞ്ഞു. 78കാരനായ ബൈഡൻ ഹൈറിസ്​ക്​ വിഭാഗത്തിലാണ്​ ഉൾപ്പെടുക. യു.എസ്​ വൈസ്​ പ്രസിഡന്റായ മൈക്ക്​ പെൻസും ഭാര്യയും കൂടാതെ, മുതിർന്ന ഉദ്യോഗസ്ഥയായ നാൻസി പെലോസിയും വെള്ളിയാഴ്ച കൊവിഡ്​ വാക്​സിൻ സ്വീകരിച്ചിരുന്നു.