ചെന്നൈ: പൊങ്കൽ സമ്മാനമായി തമിഴ്‌നാട്ടിലെ റേഷൻ കാർഡ് ഉടമകൾക്ക് 2500 രൂപ വീതം നൽകുമെന്ന് മുഖ്യമന്ത്രി എടപ്പാടി പളനിസ്വാമി പ്രഖ്യാപിച്ചു. 2021 ൽ നടക്കാനിരിക്കുന്ന നിയമസഭാ തിരഞ്ഞെടുപ്പിന്റെ പ്രചാരണത്തിന് എടപ്പാടി മണ്ഡലത്തിൽ തുടക്കം കുറിച്ചായിരുന്നു മുഖ്യമന്ത്രിയുടെ പ്രഖ്യാപനം.

2021 ജനുവരി നാല് മുതൽ തുക വിതരണം ചെയ്തു തുടങ്ങുമെന്ന് അദ്ദേഹം പറഞ്ഞു. വിളവെടുപ്പ് ഉത്സവമായ പൊങ്കൽ ആഘോഷിക്കാനാണ് തുക നൽകുന്നത്.. സംസ്ഥാനത്തെ 2.6 കോടി അരി കാർഡ് ഉടമകൾക്ക് പൊങ്കൽ പാക്കേജിന്റെ പ്രയോജനം ലഭിക്കും. പൊങ്കൽ ഉത്സവത്തിന് മുമ്പ് തുക വിതരണം ചെയ്യും.

ജനുവരി 14 നാണ് പൊങ്കൽ. 1000 രൂപ ആയിരുന്നു കഴിഞ്ഞ വർഷം നൽകിയത്. ഇതിനു പുറമെ ഒരു കിലോ അരി, പഞ്ചസാര, ഒരു കരിമ്പ് എന്നിവയും റേഷൻ കാർഡ് ഉടമകൾക്ക് സൗജന്യമായി നൽകും.