തിരുവനന്തപുരം: കോൺഗ്രസ് നേതാവ് വി എം സുധീരന് വൈറസ് ബാധ സ്ഥിരീകരിച്ചു. തിരുവഞ്ചൂർ രാധാകൃഷ്‌ണന് വൈറസ് സ്ഥിരീകരിച്ച സാഹചര്യത്തിൽ നിരീക്ഷണത്തിൽ കഴിയുകയായിരുന്നു വി എം സുധീരൻ. ചെറിയ അസ്വസ്ഥതകൾ ഉളളതിനാൽ അദ്ദേഹത്തെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
തദ്ദേശ ഭരണ സ്ഥാപനങ്ങളിലേക്ക് നടന്ന തിരഞ്ഞെടുപ്പ് ഫലം വന്നതിന് ശേഷം കെ പി സി സി രാഷ്ട്രീയകാര്യ സമിതിയോഗത്തിന് ശേഷം തിരുവഞ്ചൂർ രാധാകൃഷ്‌ണന് വൈറസ് ബാധ സ്ഥിരീകരിച്ചിരുന്നു. തിരു‍വഞ്ചൂരിന് തൊട്ടടുത്തിരുന്നാണ് യോഗത്തിൽ പങ്കെടുത്തതെന്നും അതിനാൽ നിരീക്ഷണത്തിൽ പോകുകയാണെന്നും വി എം സുധീരൻ ഫേസ്‌ബുക്ക് വഴി അറിയിക്കുകയും ചെയ്‌തു. തുടർന്ന് നടത്തിയ പരിശോധനയിലാണ് അദ്ദേഹത്തിന് വൈറസ് ബാധ സ്ഥിരീകരിച്ചത്.