കൊല്ലം: സുഹൃത്തിനൊപ്പം പാരിപ്പള്ളിയിൽ നിന്ന്‌ വാൻ മോഷ്ടിച്ച സംഭവത്തിൽ യുവതിയെ പൊലീസ്‌ അറസ്റ്റുചെയ്തു. അമ്പലപ്പുഴ ഫിനിഷിംഗ് പോയിന്റിന് സമീപം പനക്കംചിറ വീട്ടിൽ ഷിൻസിയാണ് (19) എറണാകുളം പനങ്ങാട്ട് നിന്ന്‌ പിടിയിലായത്. കൂട്ടുപ്രതിയായ വിനീത് പനങ്ങാട്‌ പൊലീസിന്റെ പിടിയിലായിരുന്നു. ഷിൻസിയുടെ വെളിപ്പെടുത്തൽ കേട്ട് പൊലീസുകാർപോലും അന്തംവിട്ടിരിക്കുകയാണ്.
കഴിഞ്ഞ16നാണ് പാരിപ്പള്ളിയിലെ വർക്ക്ഷോപ്പിൽനിന്ന് മാരുതി ഓമ്‌നി വാൻ കടത്തിക്കൊണ്ടുപോയത്‌. നിരവധി വാഹനമോഷണക്കേസുകളിലും ആയുധം കാട്ടി പണംതട്ടിയ കേസിലും പ്രതികളായ ഇവർ തമിഴ്നാട്ടിൽനിന്ന്‌ മോഷ്ടിച്ച ബൈക്കിൽ പാരിപ്പള്ളിയിലെത്തിയാണ് വാൻ കടത്തിയത്. വാനിൽ സഞ്ചരിക്കവേ തിരുവല്ല ഭാഗത്തുവച്ച് കാൽനടയാത്രക്കാരെ ഭീഷണിപ്പെടുത്തി പണം തട്ടാൻ ശ്രമിക്കുകയും പിന്നീട് എറണാകുളത്തേക്ക് കടക്കുകയുമായിരുന്നു. പാരിപ്പള്ളി എസ്.എച്ച്.ഒ രൂപേഷ് രാജ്, എസ്.ഐമാരായ നൗഫൽ, അനീസ എന്നിവർ ചേർന്നാണ് പ്രതിയെ പിടികൂടിയത്.