കോട്ടയം: അഭയക്കേസിൽ നീതികിട്ടയതിൽ സന്തോഷം രേഖപ്പെടുത്തി സിസ്റ്റർ അഭയയുടെ സഹോദരൻ ബിജു. ഇത് തെളിയില്ലെന്ന് തന്നെയാണ് ഒരു ഘട്ടം വരെയും വിശ്വസിച്ചിരുന്നതെന്നും ഒടുവിൽ നീതി കിട്ടിയെന്നുമായിരുന്നു അദ്ദേഹത്തിന്റെ പ്രതികരണം.

കേസ് തെളിയില്ലെന്ന് നാട്ടിൽ പലർക്കും സംശയം ഉണ്ടായിരുന്നു. ദൈവത്തിന്റെ ഇടപെടൽ ഉണ്ടായെന്ന് വിശ്വസിക്കാനാണ് ഇഷ്‌ടമെന്നും ബിജു പറയുന്നു. ഒരു മണിക്കൂർ കൊണ്ട് തെളിയിക്കാവുന്ന കേസാണ് 28 വർഷം കൊണ്ട് നടന്നത് . നീതിക്ക് വേണ്ടി സഭയ്‌ക്കകത്തും സമൂഹത്തിലാകെയും ആഗ്രഹിച്ച നിരവധി പേരുണ്ട് . അവരെല്ലാം വിധികേട്ട് സന്തോഷിക്കുമെന്ന് ഉറപ്പാണെന്നും ബിജു പറഞ്ഞു.

അവസാന നിമിഷം വരെ പെങ്ങൾക്ക് നീതികിട്ടുമോ എന്ന ആശങ്ക മനസിലുണ്ടായിരുന്നു. കടന്നു പോയ വർഷങ്ങളിലെ അനുഭവങ്ങൾ അതായിരുന്നുവെന്നും ബിജു പ്രതികരിച്ചു.

സിസ്റ്റർ അഭയ കൊലപാതക കേസിൽ തോമസ് കോട്ടൂരും സിസ്റ്റർ സെഫിയും കുറ്റക്കാരാണെന്നാണ് സി ബി ഐ കോടതി വിധി . ശിക്ഷ നാളെ പറയും. 28 വർഷത്തിന് ശേഷമാണ് രാജ്യത്തെ കുറ്റാന്വേഷണ ചരിത്രത്തിൽ തന്നെ സംഭവ ബഹുലമായ അഭയക്കേസിൽ തീർപ്പുണ്ടാകുന്നത്.