കാൻബറ: ബ്രിസ്ബേൺ സർവകലാശാലയിലെ വിദ്യാർത്ഥിയ്ക്ക് ലോട്ടറിയടിച്ചത് 147 കോടി രൂപ. ലോട്ടറിയടിച്ചതോടെ പഠനമൊക്കെ നിറുത്തി വിശ്രമ ജീവിതം ആസ്വദിക്കാനുള്ള പദ്ധതിയിലാണ് ഓസ്ട്രേലിയയിലെ മാക്ഗ്രിഗർ സ്വദേശിയാണ് വിദ്യാർ‌ത്ഥി. യുവാവിന്റെ പേരു വിവരങ്ങൾ വെളിപ്പെടുത്തിയിട്ടില്ല.

കഴിഞ്ഞ വ്യാഴാഴ്ചയാണ് സമ്മാനം ലഭിച്ച വിവരം വിദ്യാർത്ഥി അറിഞ്ഞത്.

തനിക്ക് ഇത്രയധികം പണം സമ്മാനമായി ലഭിച്ചുവെന്ന വാർത്ത ആദ്യം വിശ്വസിക്കാനായില്ല. രാത്രിതന്നെ വീട്ടുകാരെ വിശേഷം അറിയിക്കാൻ ശ്രമിച്ചെങ്കിലും അവർ ഉറങ്ങുകയായിരുന്നു. വിൽപ്പന അവസാനിക്കാൻ മിനിറ്റുകൾ മാത്രം ശേഷിക്കെയാണ് വിദ്യാർത്ഥി ലോട്ടറിയെടുത്തത്. തനിക്ക് എപ്പോഴെങ്കിലും ലോട്ടറിയടിക്കുമെന്നും ആ സന്തോഷ വാർത്ത തന്നെ തേടിയെത്തുമെന്നും ഉറപ്പുണ്ടായിരുന്നുവെന്ന് വിദ്യാർത്ഥി പറയുന്നു.
കൊവിഡ് പ്രതിസന്ധിയെത്തുടർന്ന് വീട്ടുകാരും സുഹൃത്തുക്കളും കടുത്ത സാമ്പത്തിക പ്രതിസന്ധിയാണ് അനുഭവിക്കുന്നത്. അവരെ സഹായിക്കുമെന്നും പഠനവും ജോലിയും അവസാനിപ്പിച്ച് വിശ്രമ ജീവിതം ആരംഭിക്കുമെന്നും വിദ്യാർത്ഥി വ്യക്തമാക്കി.