തിരുവനന്തപുരം : 65 രൂപ നിരക്കിൽ ഒരു കോടി എൽ ഇ ഡി ബൾബ് വിതരണത്തിനായി ഒരുങ്ങുന്നു. ഇതിന്റെ സംസ്ഥാനതല ഉത്ഘാടനം മുഖ്യമന്ത്രി പിണറായി വിജയൻ നിർവഹിക്കുമെന്ന് തിരുവനന്തപുരം വൈദ്യുതി ഭവനിൽ ചേർന്ന ജീവനക്കാരുടെയും ഓഫീസർമാരുടെയും സംഘടനാ പ്രതിനിധികളുടെ യോഗത്തിൽ വൈദ്യുതി മന്ത്രി എം എം മണി പറഞ്ഞു. വൈകീട്ട് ആറു മണി മുതൽ പത്തു മണി വരെയുള്ള പീക് ലോഡ് സമയത്തു ഇത് ഉപയോഗിച്ച് തുടങ്ങുമ്പോൾ നൂറു മെഗാവാട് വരെ ഉപയോഗത്തിൽ കുറവുവരും. അത് മൂലം വൈദ്യുതി വാങ്ങൽ ചെലവ് കുറയുമെന്നും മന്ത്രി പറഞ്ഞു. സാധാരണക്കാരുടെ ഉപയോഗം താഴ്ന്ന നിരക്കിലേക്ക് വരുമെന്നും ഇത്തരം ജോലികൾ ജീവനക്കാർ സാമൂഹ്യ പ്രതിബദ്ധതയോടെ ഏറ്റെടുക്കണമെന്നും മന്ത്രി കൂട്ടീച്ചർത്തു. ജീവനക്കാരുടെ ശമ്പള പരിഷ്‌കരണ കാലാവധി കഴിഞ്ഞ കാര്യം സംഘടനകൾ ഉയർത്തിയപ്പോൾ അക്കാര്യം സമയബന്ധിതമായി നടപ്പാക്കുമെന്ന് മന്ത്രി പറഞ്ഞു.

ഭാരിച്ച ഉത്തരവാദിത്തങ്ങൾ നിർവഹിക്കുമ്പോൾ വൈദ്യുതി ബോർഡിലെ ശനിയാഴ്ച്ചത്തെ അവധി പുനഃ പരിശോധിക്കേണ്ടിവരുമെന്നു മന്ത്രി പറഞ്ഞു .സർക്കാരിന്റെ തീരുമാനത്തിൽ മാറ്റം ഉണ്ടാകുന്നതു വരെ അവധി തുടരണമെന്ന് ജീവനക്കാർ ഒന്നടങ്കം ആവശ്യപ്പെട്ടു.
കെ എസ് ഇ ബി ചെയർമാൻ എൻ എസ് പിള്ള അദ്യക്ഷത വഹിച്ച യോഗത്തിൽ ഡയറക്ടർ ഡോ വി.ശിവദാസൻ, കെ.എസ്.ഇ.ബി എഞ്ചിനീയേഴ്സ് അസോസിയഷൻ ജെന. സെക്രെട്ടറി സുനിൽ.കെ, ഓഫീസേഴ്സ് അസോസിയേഷൻ പ്രസിഡന്റ് ജെ.സത്യരാജൻ, കെ എസ് ഇ ബി ഓഫീസേഴ്സ് സംഘ് പ്രസിഡന്റ് യു.വി.സുരേഷ്, പവർ ബോർഡ് ഓഫീസേഴ്സ് ഫെഡറേഷൻ ജെന. സെക്രെട്ടറി സുനിൽ.കെ.എസ്, ഓഫീസേഴ്സ് ഫെഡറേഷൻ പ്രസിഡന്റ് അനന്തകൃഷ്ണൻ, ഓഫീസേഴ്സ് കോൺഫെഡറേഷൻ ജെന. സെക്രെട്ടറി പി പ്രശാന്ത്, വർക്കേഴ്സ് അസോസിയേഷൻ ജെന. സെക്രെട്ടറി ജയപ്രകാശ്, വർക്കേഴ്സ് ഫെഡറേഷൻ ജെന. സെക്രെട്ടറി എം.വിഗോപകുമാർ, വൈദ്യുതി മസ്ദൂർ സംഘ് ജെന. സെക്രെട്ടറി ഗിരീഷ് കുളത്തൂർ, ഇലക്ട്രിസിറ്റി എംപ്ലോയീസ് കോൺഫെഡറേഷൻ സെക്രെട്ടറി രാജേഷ്‌കുമാർ.എസ്.ആർ എന്നിവർ സംസാരിച്ചു. കെ.എസ്.ഇ.ബി വിതരണ വിഭാഗം ഡയറക്ടർ പി.കുമാരൻ, ആസൂത്രണ വിഭാഗം ഡയറക്ടർ മിനി ജോർജ്, മന്ത്രിയുടെ അഡിഷണൽ പ്രൈവറ്റ് സെക്രട്ടറിമാരായ എം ഷാജഹാൻ , എം ജി സുരേഷ് കുമാർ എന്നിവരെ കൂടാതെ വൈദ്യുതി ബോർഡിലെ ഉയർന്ന ഉദ്യോഗസ്ഥരും പങ്കെടുത്തു.