തിരുവനന്തപുരം: ദക്ഷിണേഷ്യയിലെ ഏറ്റവും വലിയ ഹോസ്പിറ്റാലിറ്റി കമ്പനിയായ ഇന്ത്യൻ ഹോട്ടൽസ് കമ്പനി ലിമിറ്റഡ് (ഐഎച്ച്സിഎൽ) തിരുവനന്തപുരത്ത് അംബികാ വിലാസ് ആമാ സ്റ്റേയ്സ് ആൻഡ് ട്രെയിൽസ് ഹെരിറ്റേജ് ബംഗ്ലോയ്ക്ക് തുടക്കം കുറിച്ചു. ദൈവത്തിന്റെ സ്വന്തം നാട്ടിലെ വിശാലമായ ഈ വില്ലയിൽ മൂന്ന് സ്വീറ്റുകളാണുള്ളത്. തിരുവിതാംകൂർ മഹാരാജാവിന്റെ സൈന്യത്തിലും ഭരണത്തിലും ഭാഗഭാക്കായിരുന്ന യുവ പ്രഭു 1900കളുടെ തുടക്കത്തിലാണ് ഈ വില്ല പണിതീർത്തത്.

ചുറ്റുപാടുകളുമായി ചേർന്നുനിൽക്കുന്ന വാസ്തുവിദ്യയുടെ ഭംഗിയാണ് ഈ ബംഗ്ലാവിനെ വേറിട്ടു നിർത്തുന്നത്. പരമ്പരാഗത തച്ചുശാസ്ത്രത്തെ അടിസ്ഥാനമാക്കി നിർമ്മിച്ച ഈ കെട്ടിടത്തിന് അതിന്റേതായ തനിമയുണ്ട്. ഈ ബംഗ്ലാവിന്റെ അകത്തളങ്ങൾ ചുറ്റുപാടുമുള്ള പൂന്തോട്ടവുമായി ഇഴുകിച്ചേരുന്ന വിധമാണ്.

ആകാശത്തേയ്ക്ക് മിഴിതുറക്കുന്ന ചെറിയൊരു പൂന്തോട്ടമാണ് ഈ വീടിന്റെ കേന്ദ്രഭാഗം. കേരള വീടുകളുടേതുപോലെയാണ് ഈ അങ്കണം. വീടിന്റെ ഹൃദയഭാഗമെന്നു പറയാവുന്ന ഇവിടെ കുടുംബങ്ങൾക്ക് ഒത്തുകൂടുന്നതിനും ആഹാരം കഴിക്കുന്നതിനും ആഘോഷങ്ങൾക്കുമുള്ള സ്ഥലമാണ്. തടിക്കൂട്ടിൽ തീർത്ത ചെരിഞ്ഞ മേൽക്കൂരയുള്ള വരാന്തകളാണ് വീടിന്റെ ചുറ്റോടുചുറ്റും. കടൽക്കാറ്റ് ഉള്ളിലേയ്‌ക്കെടുക്കുന്ന ഈ വരാന്തകൾ ഈ ബംഗ്ലാവിനെ കടുത്ത വേനൽമാസങ്ങളിൽ പോലും കുളിർമ്മയോടെ നിലനിർത്തുന്നു.

പ്രാദേശിക സംസ്‌കാരം ആസ്വദിക്കാൻ ആഗ്രഹിക്കുന്നവർക്ക് അംബികാ വിലാസിന്റെ ചരിത്രത്തോട് ഇഴുകിച്ചേരാനും ആമാ സ്റ്റേയ്സ് ആൻഡ് ട്രെയിൽസ് ടീം ഒരുക്കുന്ന അനുഭവങ്ങൾ സ്വന്തമാക്കാനും സാധിക്കും. ശ്രീപത്മനാഭസ്വാമി ക്ഷേത്രം, ആറ്റുകാൽ ഭഗവതി ക്ഷേത്രം, പഴവങ്ങാടി ഗണപതിയമ്പലം എന്നിങ്ങനെയുള്ള ക്ഷേത്രങ്ങളിൽ സന്ദർശനം നടത്തുന്നതിനും ചാല മാർക്കറ്റിലെ സുഗന്ധവ്യഞ്ജനങ്ങൾ അടുത്തറിയാനും പുത്തൻ ഉത്പന്നങ്ങൾ ഉപയോഗിച്ച് ഷെഫുമാർ തയാറാക്കുന്ന പ്രാദേശിക കേരള വിഭവങ്ങൾ രുചിച്ചറിയാനും അംബികാവിലാസ് അവസരമൊരുക്കും.

സാഹസികത ഇഷ്ടപ്പെടുന്നവർക്ക് അടുത്തുള്ള നെയ്യാർ വന്യമൃഗ സങ്കേതത്തിൽ മുതലകളെയും കടുവകളേയും കാണാൻ സാധിക്കും. ചരിത്രാന്വേഷികൾക്ക് പത്തൊൻപതാം നൂറ്റാണ്ടിലെ നേപ്പിയർ ദേശീയ മ്യൂസിയം അടുത്തുകാണാം. വൈകുന്നേരങ്ങളിൽ ശംഖുമുഖത്തെ കടൽത്തീരത്തെ സൂര്യാസ്തമയം ആസ്വദിക്കാം.

തിരുവനന്തപുരം എയർപോർട്ടിനോട് ചേർന്നു കിടക്കുന്ന അംബികാ വിലാസ് കേരളത്തിന്റെ വശ്യസൗന്ദര്യം ആസ്വദിക്കാൻ ആഗ്രഹിക്കുന്നവർക്ക് അവധി ആസ്വദിക്കാനുള്ള മികച്ച കേന്ദ്രമാണ്.

തലസ്ഥാനത്തെ ആദ്യത്തേയും സംസ്ഥാനത്തെ രണ്ടാമത്തേയും ആമാ സ്റ്റേയ്സ് ആൻഡ് ട്രെയിൽസ് ബംഗ്ലോ ആണിത്. ഇന്ത്യയിലെ ആദ്യത്തെ ബ്രാൻഡഡ് ഹോം സ്റ്റേയായ ആമാ സ്റ്റേയ്സ് ആൻഡ് ട്രെയിൽസിന് 24 ബംഗ്ലാവുകളും വില്ലകളുമാണുള്ളത്. ഇവയിൽ ഏഴെണ്ണം വികസനത്തിന്റെ ഘട്ടങ്ങളിലാണ്.