ശാന്തിയുടെയും സമാധാനത്തിന്റെയും ആഘോഷമായിട്ടാണ് ലോകജനത ക്രിസ്മസ് ആഘോഷിക്കുന്നത്. ബത്‌ലഹേമിലെ കാലിത്തൊഴുത്തിൽ ദൈവപുത്രൻ മനുഷ്യനായി അവതരിച്ചതിന്റെ ഓർമ്മപ്പെടുത്തലാണ് ഓരോ ക്രിസ്മസ് കാലവും.

ഒത്തുചേരലിന്റെയും പങ്കുവയ്ക്കലിന്റെയും സന്ദേശം പകരുന്ന ക്രിസ്മസ് ലോകം ആഘോഷിക്കുന്നത് ഡിസംബർ 25നാണ്. എന്നാൽ ഈ ദിവസം ക്രിസ്മസ് ആഘോഷിക്കാത്ത ചില രാജ്യങ്ങളുമുണ്ട്. അവിടെ എന്തു കൊണ്ടാണ് ഡിസംബർ 25ന് ക്രിസ്മസ് ആഘോഷിക്കാത്തത് എന്നും നോക്കാം.

ലോകത്തിലെ ഒട്ടുമിക്ക രാജ്യങ്ങളും ഡിസംബർ 25 ന് രക്ഷകന്റെ പിറവി ആഘോഷിക്കുമ്പോൾ മദ്ധ്യേഷ്യയിലെയും കിഴക്കൻ യൂറോപ്പിലെയും നിരവധി രാജ്യങ്ങൾ ഈ ദിവസമല്ല ക്രിസ്മസ് ആഘോഷിക്കുന്നത്. ഈ രാജ്യങ്ങളെല്ലാം തന്നെ ക്രിസ്മസ് കഴിഞ്ഞ് 13 ദിവസങ്ങൾക്കു ശേഷമാണ് തങ്ങളുടെ ക്രിസ്മസ് ആഘോഷിക്കുന്നത്. ജനുവരി ആറിനോ ഏഴിനോ ആണ് ഇവിടെ ക്രിസ്മസ് ആഘോഷിക്കുന്നത്.

വ്യത്യസ്തമായ ഈ ആഘോഷത്തിനു പിന്നിലെ കാരണം അവർ പിന്തുടരുന്ന കലണ്ടറാണ്. ഡിസംബർ 25ന് ക്രിസ്മസ് ആഘോഷിക്കുന്നവർ പിന്തുടരുന്നത് ഗ്രിഗോറിയൻ കലണ്ടറാണെങ്കിൽ ഈ രാജ്യങ്ങൾ പിൻതുടരുന്നത് ജൂലിയൻ കലണ്ടറാണ്. ഏഷ്യയിലെയും ഈസ്​റ്റേൺ യൂറോപ്പിലെയും ചില രാജ്യങ്ങളിലാണ് ഇതുള്ളത്. ബെലാറസ്, ഈജിപ്ത്, ജോർജിയ, എത്യോപ്യ, കസാക്കിസ്ഥാൻ, സെർബിയ എന്നിവയാണ് ഇതിൽ പ്രധാനപ്പെട്ട രാജ്യങ്ങൾ. റഷ്യയുടെ പല ഭാഗങ്ങളിലും ജനുവരി 7നാണ് ക്രിസ്മസ് ആഘോഷിക്കുന്നത്. ഇ​റ്റലിയിൽ ക്രിസ്മസ് ആഘോഷിക്കുന്നത് ജനുവരി ആറിന് എപ്പിഫാനി തിരുന്നാൾ ദിനമായാണ്.