തിരുവനന്തപുരം: തിരുവനന്തപുരം നിയുക്ത മേയർ ആര്യ രാജേന്ദ്രനെ അഭിനന്ദിച്ച് നടൻ മോഹൻലാൽ. നമുക്കൊക്കെ ഇഷ്ടപ്പെട്ട നഗരമാണ് തിരുവനന്തപുരമെന്നും, അതിനെ മനോഹരമാക്കാൻ കിട്ടിയ സമയമാണെന്നും അദ്ദേഹം ആര്യയോട് പറഞ്ഞു.

എല്ലാ പിന്തുണകളും മോഹൻലാൽ നിയുക്ത മേയർക്ക് വാഗ്ദ്ധാനം ചെയ്യുകയും ചെയ്തു. അടുത്ത തവണ തിരുവനന്തപുരത്ത് വരുമ്പോൾ നേരിൽ കാണാമെന്നും അദ്ദേഹം ആര്യയ്ക്ക് ഉറപ്പ് നൽകി. ഫോണിലൂടെയാണ് മോഹൻലാൽ ആര്യയെ അഭിനന്ദിച്ചത്.

'നമസ്‌കാരം ലാലേട്ടാ, വലിയ സന്തോഷം. ലാലേട്ടന്റെ വീടിന്റെ തൊട്ടടുത്താണ് ഞാൻ. വീടെവിടെയാണെന്ന് ചോദിക്കുമ്പോൾ പറയുന്നത് അത് തന്നെയാണ്. നല്ല രീതിയിൽ കൊണ്ടുപോകാൻ കഴിയുമെന്ന വിശ്വാസമുണ്ട്. ലാലേട്ടൻ വിളിച്ചതിൽ ഒരുപാട് സന്തോഷം.വരുമ്പോൾ എന്തായാലും നേരിട്ട് കാണാം.'- എന്നായിരുന്നു ആര്യ മോഹൻലാലിന് നൽകിയ മറുപടി.