തിരുവനന്തപുരം: കാരക്കോണത്ത് അമ്പത്തിയൊന്നുകാരി ഷോക്കേറ്റ് മരിച്ചു. ത്രേസ്യാപുരം സ്വദേശി ശാഖാകുമാരി (51) ആണ് മരിച്ചത്. മരണത്തിൽ ദുരൂഹതയുണ്ടെന്ന് പൊലീസ് അറിയിച്ചു. ഇവരുടെ ഇരുപത്തിയെട്ടുകാരനായ ഭർത്താവ് അരുണിനെ പൊലീസ് കസ്റ്റഡിയിലെടുത്തിട്ടുണ്ട്.

ഇന്ന് പുലർച്ചെയാണ് ശാഖാകുമാരിയെ ഭർത്താവ് കാരക്കോണം മെഡിക്കൽ കോളജിൽ എത്തിച്ചത്. അശുപത്രിയിലെത്തിക്കുമ്പോഴേക്ക് മരണം സംഭവിച്ചിരുന്നു. വീട്ടിൽവച്ചു ഷോക്കേൽക്കുകയായിരുന്നുവെന്നാണ് ഇയാൾ പറഞ്ഞത്. ഡോക്ടർമാർ ചില സംശയങ്ങൾ പൊലീസിനോട് പറഞ്ഞതോടെയാണ് അരുണിനെ കസ്റ്റഡിയിലെടുത്തത്.

ശാഖാകുമാരിയുടെ വീട്ടിൽ ഫൊറൻസിക് സംഘം പരിശോധന നടത്തി. പോസ്റ്റുമോർട്ടം റിപ്പോർട്ട് ലഭിച്ചാലേ കൂടുതൽ വിവരങ്ങൾ ലഭിക്കുകയുള്ളൂവെന്ന് പൊലീസ് പറഞ്ഞു. രണ്ടുമാസം മുൻപാണ് ശാഖാകുമാരിയും അരുണും വിവാഹിതരായത്.