ന്യൂഡല്‍ഹി: കാർഷിക നിയമങ്ങൾക്കെതിരെ സമരം നടത്തുന്ന കർഷകർക്ക് പിന്തുണ പ്രഖ്യാപിച്ച് ഒരു സഖ്യകക്ഷി കൂടി എൻ.ഡി.എ വിട്ടു. രാഷ്ട്രീയ ലോക് താന്ത്രിക് പാര്‍ട്ടിയാണ് എൻ.ഡി.എ വിട്ടത്. കര്‍ഷകര്‍ക്ക് പിന്തുണ പ്രഖ്യാപിച്ചുകൊണ്ട് അകാലിദള്‍ നേരത്തേ മുന്നണി വിട്ടിരുന്നു.
കര്‍ഷകര്‍ക്കെതിരായവര്‍ക്കൊപ്പം നില്‍ക്കാനാവില്ലെന്ന് ഷാജഹാന്‍പുര്‍-ഖേദ അതിര്‍ത്തിയില്‍ പ്രതിഷേധിക്കുന്ന കര്‍ഷകരെ അഭിസംബോധന ചെയ്തുകൊണ്ട് ആര്‍.എല്‍.പി നേതാവ് ഹനുമാന്‍ ബെനിവാൾ പറഞ്ഞു. രാജസ്ഥാനിലെ നഗൗറില്‍ നിന്നുളള എം.പിയാണ് ഹനുമാന്‍ ബെനിവാള്‍.
2018-ലാണ് ബിജെപി വിട്ട് രാഷ്ട്രീയ ലോക് താന്ത്രിക് പാര്‍ട്ടിക്ക് ബെനിവാള്‍ രൂപം നല്‍കുന്നത്. 2019-ല്‍ നടന്ന പൊതുതിരഞ്ഞെടുപ്പില്‍ എന്‍.ഡി.എ സഖ്യകക്ഷിയായി തിരഞ്ഞെടുപ്പില്‍ മത്സരിച്ചു.