ന്യൂഡൽഹി: കേന്ദ്രസർക്കാരിന്റെ കാർഷിക നിയമങ്ങൾക്കെതിരെ സമരം നടത്തുന്ന കർഷകർക്ക് ഐക്യദാർഢ്യം പ്രഖ്യാപിച്ച് ഡൽഹി മുഖ്യമന്ത്രി അരവിന്ദ് കെ‌ജ്‌രിവാൾ. ഡൽഹി ഹയിയാന അതിർത്തിയായ സിംഘുവിലെ കർഷക പ്രക്ഷോഭ വേദിയിലാണ് കെജരിവാൾ എത്തിയത്. കാർഷിക നിയമങ്ങളെ കുറിച്ച് വ്യക്തമായി അറിയുന്ന കേന്ദ്രനേതാക്കളോട് കർഷകരുമായി സംവാദം നടത്താൻ ഞാൻ വെല്ലുവിളിക്കുകയാണ്. ആർക്കാണ് കൂടുതൽ അറിയുന്നത് എന്ന് അപ്പോൾ മനസിലാക്കാമെന്ന് അദ്ദേഹം പറഞ്ഞു.

കാർഷിക നിയമങ്ങൾ എങ്ങനെയാണ് കർഷകർക്ക് ഗുണകരമാകുന്നത് എന്നു പറയാൻ കഴിയുന്ന ഒരു കേന്ദ്ര നേതാവിനെ പോലും തനിക്ക് കാണാൻ സാധിച്ചില്ലെന്ന് അദ്ദേഹം പറഞ്ഞു. കഴിഞ്ഞ 32 ദിവസമായി കർഷകർ കടുത്ത ശൈത്യത്തെ അതിജീവിച്ച് തെരുവിൽ കഴിയുകയാണ്. നാൽപ്പതിന് പുറത്ത് ആളുകൾ മരിച്ചു. കർഷകരെ കേൾക്കാനും നിയമങ്ങൾ പിൻവലിക്കാനും കേന്ദ്ര സർക്കാരിനോട് കെജ്‌രിവാൾ അഭ്യർത്ഥിച്ചു.