ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം എട്ട് കോടി പതിനൊന്ന് ലക്ഷം കടന്നു. നാല് ലക്ഷത്തിലധികം പേർക്കാണ് പുതുതായി വൈറസ് ബാധ സ്ഥിരീകരിച്ചത്. 17,71,365 പേർ മരിച്ചു. നിലവിൽ രണ്ട് കോടി ഇരുപത് ലക്ഷം പേരാണ് ചികിത്സയിലുള്ളത്. രോഗബാധിതരുടെ എണ്ണത്തിൽ ആദ്യമൂന്ന് സ്ഥാനങ്ങളിലുള്ളത് അമേരിക്ക, ഇന്ത്യ, ബ്രസീൽ എന്നീ രാജ്യങ്ങളാണ്.

ഇന്ത്യയിൽ 1,02,08,725 കൊവിഡ് ബാധിതരാണ് ഉള്ളത്. നിലവിൽ 2,76,028 പേരാണ് ചികിത്സയിലുള്ളത്. 1,47,940 പേർ മരിച്ചു. രോഗമുക്തി നേടിയവരുടെ എണ്ണം തൊണ്ണൂറ്റിയേഴ് ലക്ഷം പിന്നിട്ടു. പ്രതിദിന കൊവിഡ് കേസുകൾ ആറ് മാസത്തിനിടയിലെ ഏറ്റവും കുറഞ്ഞ നിലയിലെത്തി. കഴിഞ്ഞദിവസം 18,732 പേർക്കാണ് കൊവിഡ് സ്ഥിരീകരിച്ചത്.

രോഗികളുടെ എണ്ണത്തിലും മരണത്തിലും ലോകത്ത് അമേരിക്കയാണ് ഒന്നാം സ്ഥാനത്ത്. യുഎസിൽ ഒരുകോടി തൊണ്ണൂറ്റിയഞ്ച് ലക്ഷം പേർക്കാണ് ഇതുവരെ കൊവിഡ് സ്ഥിരീകരിച്ചത്. 3,41,138 പേർ മരിച്ചു. 1.14 കോടി പേർ സുഖം പ്രാപിച്ചു. ബ്രസീലിൽ എഴുപത്തിനാല് ലക്ഷം രോഗബാധിതരാണ് ഉള്ളത്.1,91,146 പേർ മരിച്ചു.