തിരുവനന്തപുരം: പി കെ കുഞ്ഞാലിക്കുട്ടി എം പി കർദ്ദിനാൾ ക്ലീമിസുമായി കൂടിക്കാഴ്‌ച നടത്തി. നിയമസഭ തിരഞ്ഞെടുപ്പിൽ മദ്ധ്യ തിരുവിതാംകൂറിലെ വോട്ട് യു ഡി എഫിന് നിർണായകമെന്നിരിക്കെയാണ് കർദ്ദിനാളുമൊത്തുളള കുഞ്ഞാലിക്കുട്ടിയുടെ കൂടിക്കാഴ്‌ച. രാഷ്ട്രീയ വിഷയങ്ങളും കർദ്ദിനാളുമായി സംസാരിച്ചുവെന്ന് അദ്ദേഹം പറഞ്ഞു. എന്തെങ്കിലും തരത്തിലുളള ആശങ്കയുണ്ടെങ്കിൽ പരിഹരിക്കുമെന്ന് ഉറപ്പുനൽകിയെന്നും കൂടിക്കാഴ്‌ചക്ക് ശേഷം കുഞ്ഞാലിക്കുട്ടി മാദ്ധ്യമങ്ങളോട് പറഞ്ഞു.
അതേസമയം കോട്ടയത്ത് മാദ്ധ്യമങ്ങളെ കണ്ട ഉമ്മൻചാണ്ടി, കോൺഗ്രസും യു ഡി എഫും ഒറ്റക്കെട്ടായി പ്രവർത്തിക്കുമെന്ന് വ്യക്തമാക്കി. താൻ നേതൃത്വത്തിലേക്ക് വരണമെന്ന ഘടകകക്ഷികളുടെ ആവശ്യം സംബന്ധിച്ച് ചോദ്യത്തിന് മറുപടി നൽകാതെ അദ്ദേഹം ഒഴിഞ്ഞുമാറി.
തദ്ദേശ തിരഞ്ഞെടുപ്പിലെ പരാജയം യു ഡി എഫിനെ ആശങ്കപ്പെടുത്തിയിട്ടുണ്ട്. വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി മുന്നണിയുടെ ജനസ്വാധീനം കൂടുതൽ ശക്തമാക്കാനുളള പ്രവർത്തനങ്ങളിലാണ് നേതാക്കൾ ഏർപ്പെട്ടിരിക്കുന്നത്.