ന്യൂവെല്ലി : 1960 കളിലും 70 കളിലും തന്റെ സ്വതസിദ്ധമായ വസ്ത്രാലങ്കാര ശൈലിയാൽ അന്താരാഷ്ട്ര ശ്രദ്ധ നേടിയ ഫ്രഞ്ച് ഡിസൈനർ പിയറി കാർഡിൻ അന്തരിച്ചു. പാരിസിലെ ന്യൂവെല്ലിയിലെ സ്വകാര്യ ആശുപത്രിയിൽ ഇന്നായിരുന്നു അന്ത്യം. 98 വയസ്സായിരുന്നു. 60വർഷത്തിലേറെയായി ഫാഷൻ ലോകത്ത് നിറഞ്ഞു നിന്ന കാർഡിൻ നൂതനമായ ആശയങ്ങളിലൂടെ ഫാഷൻ ലോകത്ത് വിപ്ലവകരമായ മാറ്റങ്ങൾക്ക് തുടക്കം കുറിച്ചു. വടക്കൻ ഇറ്റലിയിലെ ട്രെവിസോയ്ക്കടുത്താണ് കാർഡിന്റെ ജനനമെങ്കിലും പിന്നീട് ഫ്രാൻസിൽ സ്ഥിരതാമസമാക്കി. വളരെ ചെറുപ്രായത്തിൽ തന്നെ ഫാഷൻ ഡിസൈനിംഗിൽ ആകൃഷ്ടനായ അദ്ദേഹം പതിനാലാമത്തെ വയസിൽ ഫാഷൻ ഡിസൈംനിഗിന്റെ ലോകത്തേക്ക് ചുവടുവച്ചു. പിന്നീട് പാരിസിലേക്ക് താമസം മാറ്റിയ കാർഡിൻ 1950 ൽ സ്വന്തമായി ഫാഷൻ ഹൗസ് സ്ഥാപിച്ചു. 1954 ൽ അദ്ദേഹം അവതരിപ്പിച്ച ബബിൾ ഡ്രെസ് ഫാഷൻ ലോകത്ത് വളരെ ചർച്ചയാകുകയും അദ്ദേഹം അന്താരാഷ്ട്ര തലത്തിൽ ശ്രദ്ധിക്കപ്പെടുകയും ചെയ്തു. കാർഡിൻ തന്റെ പേരു തന്നെയാണ് ഫാഷൻ ബ്രാന്റ് നെയിം ആയി ഉപയോഗിച്ചിരുന്നത്. വസ്ത്രാലങ്കാരത്തിൽ തുടങ്ങിയെങ്കിലും പിന്നീട് തന്റെ ബിസിനസ് സൗന്ദര്യ വ‌ർദ്ധക വസ്തുക്കളുടെ നിർമ്മാണത്തിലേക്കും അദ്ദേഹം ചുവട് വെച്ചു. പിന്നാലെഫർണിച്ചർ രംഗത്തേക്കും ബിസിനസ് വ്യാപിപ്പിച്ച അദ്ദേഹത്തിന്റെ ബിസിനസ് സംരംഭങ്ങളെല്ലാം വൻ വിജയമായി. തന്റെ വ്യത്യസ്തമായ ഡിസൈനിലൂടെ ലോകമെമ്പാടും ആരാധകരെ സൃഷ്ടിക്കാൻ അദ്ദേഹത്തിന് കഴിഞ്ഞു. 1991 ൽ യുനെസ്കോയുടെ ഗുഡ്‌വിൽ അമ്പാസിഡറായി തിരഞ്ഞെടുത്തു.