മലപ്പുറം: തദ്ദേശ തിരഞ്ഞെടുപ്പിന്റെ ഫലപ്രഖ്യാപനം ഇന്നുവരുന്ന സാഹചര്യത്തിൽ ജില്ലയിൽ മുഴുവൻ പ്രദേശങ്ങളിലും ക്രമസമാധാന പ്രശ്നങ്ങൾ തടയുന്നതിനും ജനജീവിതം സുഗമമാക്കുന്നതിനും കൊവിഡ് വ്യാപനം തടയുന്നതിനുമായി ഇന്നുമുതൽ ഡിസംബർ 22 വരെ സി.ആർ.പി.സി സെക്ഷൻ 144 പ്രകാരം ജില്ലാ കളക്ടർ കെ. ഗോപാലകൃഷ്ണൻ നിരോധനാജ്ഞ പ്രഖ്യാപിച്ചു.രാത്രി എട്ടുമണി മുതൽ രാവിലെ എട്ടുവരെയാണ് നിരോധനാജ്ഞ പ്രഖ്യാപിച്ചിരിക്കുന്നത്.

നിബന്ധനകൾ

രാത്രി എട്ടുമുതൽ രാവിലെ എട്ടുവരെ വിവാഹം, മരണം എന്നീ ചടങ്ങുകൾ ഒഴികെ പ്രകടനം, ഘോഷയാത്ര, സമ്മേളനങ്ങൾ മുതലായവ അനുവദനീയമല്ല.

രാത്രി എട്ടിനുശേഷം ആരാധനാലയങ്ങൾ ഒഴികെയുള്ള സ്ഥലങ്ങളിലും സ്ഥാപനങ്ങളിലും മൈക്ക് ഉപയോഗിക്കാൻ പാടില്ല.

തുറന്ന വാഹനങ്ങൾ അനുവദനീയമായ ശബ്ദത്തിൽ കൂടുതലുള്ള ഉച്ചഭാഷിണിയും സൈറ്റുകളും പകൽ സമയത്തും ഉപയോഗിക്കുവാൻ പാടില്ല.

പകൽസമയത്തെ വിജയാഹ്ലാദ പരിപാടികളിലും സമ്മേളനങ്ങളിലും മറ്റും 100ൽ കൂടുതൽ ആളുകൾ പങ്കെടുക്കുവാൻ പാടില്ല. ഈ പരിപാടികളിൽ സർക്കാർ നിർദ്ദേശിച്ചിട്ടുള്ള കൊവിഡ് മാനദണ്ഡങ്ങൾ പാലിക്കേണ്ടതാണ്.

10 വയസിന് താഴെയുള്ള കുട്ടികളും 65 വയസിന് മുകളിലുള്ള സ്ഥാനാർത്ഥികൾ ഒഴികെയുള്ള വ്യക്തികളും വിജയാഹ്ലാദ പരിപാടികളിലും സമ്മേളനങ്ങളിലും മറ്റും പങ്കെടുക്കുവാൻ പാടില്ല.