പത്തനംതിട്ട: എച്ച്.ഐ.വി ബാധിതരായ രോഗികളോടുളള വിവേചനം പരിഷ്‌കൃത സമൂഹത്തിന് ചേർന്നതല്ലെന്നും അവരെ സാധാരണ രോഗികളെപോലെ തന്നെ കാണുന്നതിന് നമുക്ക് സാധിക്കണമെന്നും ജില്ലാ കളക്ടർ പി.ബി നൂഹ് പറഞ്ഞു. ജില്ലാ മെഡിക്കൽ ഓഫീസിന്റെയും ആരോഗ്യ കേരളത്തിന്റെയും ആഭിമുഖ്യത്തിൽ സംഘടിപ്പിച്ച ലോക എയ്ഡ്‌സ് ദിനാചരണത്തിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. ചടങ്ങിൽ ജില്ലാ മെഡിക്കൽ ഓഫീസർ ഡോ.എ.എൽ ഷീജ അദ്ധ്യക്ഷത വഹിച്ചു. എൻ.എച്ച്.എം ജില്ലാ പ്രോഗ്രാം മാനേജർ ഡോ.എബി സുഷൻ എയ്ഡ്‌സ് ദിന പ്രതിജ്ഞ ചൊല്ലികൊടുത്തു. കളക്ടറേറ്റിൽ നടന്ന ചടങ്ങിൽ അസിസ്റ്റന്റ് കളക്ടർ വി.ചെൽസാസിനി, ജില്ലാ ടി.ബി ഓഫീസർ ഡോ. നിതീഷ് ഐസക് സാമുവൽ, ജില്ലാ മാസ് മീഡിയ ഓഫീസർ എ. സുനിൽ കുമാർ, ഇലന്തൂർ നേഴ്‌സിംഗ് കോളജ് വിദ്യാർഥികൾ, ആരോഗ്യ വകുപ്പ് ജീവനക്കാർ, കള്കടറേറ്റ് ജീവനക്കാർ തുടങ്ങിയവർ പങ്കെടുത്തു.