തിരുവല്ല: നഗരത്തിൽ യുവാവിന് നേരെ പട്ടാപ്പകൽ നാലംഗ മുഖംമൂടി സംഘം ഗുണ്ടാ ആക്രമണം നടത്തി. കുരിശുകവലയിലെ അനായ് ട്രാവൽസ് ഉടമ പെരിങ്ങര സ്വദേശി സരസൻ (45) നേരെയാണ് ആക്രമണം ഉണ്ടായത്. ഇന്നലെ രാവിലെ പത്തിന് ശങ്കരമംഗലം ബിൽഡിംഗിലെ സ്ഥാപനത്തിലേക്ക് വരുമ്പോഴാണ് ആക്രമണം ഉണ്ടായത്. ബൈക്കിലെത്തിയ സംഘം മുഖംമറച്ചശേഷം ഹെൽമെറ്റ് ധരിച്ചെത്തി പതിയിരുന്ന് ആക്രമിക്കുകയായിരുന്നു. പിന്നാലെയെത്തി സരസനെ തലയ്ക്കടിച്ച് വീഴ്ത്തി സംഘംചേർന്ന് മർദ്ദിക്കുകയായിരുന്നു. ബഹളംകേട്ട് ആളുകൾ ഓടിക്കൂടിയതോടെ നാൽവർ സംഘം ബൈക്കിൽ രക്ഷപ്പെട്ടു. കൈയ്ക്കും തലയ്ക്കും പരിക്കേറ്റ സരസൻ തിരുവല്ല താലൂക്ക് ആശുപത്രിയിൽ ചികിത്സ തേടി. തിരുവല്ല പൊലീസ് സ്ഥലത്തെത്തി അന്വേഷണം നടത്തി. സമീപത്തെ സ്ഥപനങ്ങളുടെ കാമറ ദൃശ്യങ്ങൾ പരിശോധിച്ചു അക്രമികളെ കണ്ടെത്താനുള്ള നടപടി പൊലീസ് തുടങ്ങിയിട്ടുണ്ട്.