ശബരിമല : കൊവിഡ് പ്രതിരോധം ശക്തമാക്കുന്നതിന്റെ ഭാഗമായി ശബരിമല സന്നിധാനത്തും പരിസര പ്രദേശങ്ങളിലും താമസിക്കുന്ന മുഴുവൻ ആളുകളും 14 ദിവസത്തിലൊരിക്കൽ നിർബന്ധമായും ആന്റിജൻ പരിശോധന നടത്തണമെന്ന് സന്നിധാനം എക്‌സിക്യുട്ടീവ് മജിസ്‌ട്രേറ്റ് സി.പി.സത്യപാലൻ നായർ അറിയിച്ചു. സന്നിധാനത്തെയും പരിസരത്തെയും കടകളിലും മറ്റിടങ്ങളിലും കൊവിഡ് പരിശോധന നടത്തണമെന്ന് നിർദേശിച്ച് നോട്ടീസ് നൽകി.നോട്ടീസ് ലഭിച്ച് രണ്ടു ദിവസത്തിനകം എല്ലാ ജീവനക്കാരും പരിശോധന നടത്തി സർട്ടിഫിക്കറ്റ് സൂക്ഷിക്കണം.സ്ഥാപനങ്ങളിലെ പരിശോധന സമയത്ത് സർട്ടിഫിക്കറ്റ് ഹാജരാക്കണം.14 ദിവസം പ്രാബല്യമുള്ള കൊവിഡ് നെഗറ്റീവ് സർട്ടിഫിക്കറ്റ് കൈവശമില്ലാത്ത സ്ഥാപനങ്ങളിലെ ജീവനക്കാരടക്കമുള്ള ആരെയും സന്നിധാനത്തും പരിസര പ്രദേശങ്ങളിലും യാതൊരു കാരണവശാലും തുടരാൻ അനുവദിക്കില്ല.നിർദേശം പാലിക്കാത്തവരെ നിർബന്ധമായും തിരിച്ചയക്കുന്നതാണെന്നും എക്‌സിക്യുട്ടീവ് മജിസ്‌ട്രേറ്റ് അറിയിച്ചു.