തിരുവല്ല: നടൻ എം.ജി സോമന്റെ 23-ാംമത് ചരമവാർഷികം തിരുമൂലപുരത്തുള്ള വസതിയിൽ സമുചിതമായി ആചരിച്ചു. എം.ജി സോമൻ ഫൗണ്ടേഷന്റെയും ആസാദ് നഗർ റസിഡന്റസ് അസോസിയേഷന്റെയും സംയുക്താഭിമുഖ്യത്തിലാണ് അനുസ്മരണ പരിപാടികൾ സംഘടിപ്പിച്ചത്. എം. ജി സോമൻ അന്ത്യവിശ്രമം കൊള്ളുന്ന മണ്ണടിപറമ്പിൽ വീട്ടുവളപ്പിൽ സഹധർമ്മിണി സുജാതാ സോമൻ ഭദ്രദീപം തെളിയിച്ചു. തുടർന്ന് പുഷ്പാർച്ചനയും അനുസ്മരണയോഗവും നടത്തി. ഫൗണ്ടേഷൻ ചെയർമാനും സംവിധായകനുമായ ബ്ലെസി മുഖ്യപ്രഭാഷണം നടത്തി. എം.ജി സോമന്റെ സ്മരണയ്ക്കായി അദ്ദേഹത്തിന്റെ പ്രതിമ സ്ഥാപിക്കാനും നാടകോത്സവങ്ങൾ സംഘടിപ്പിക്കാനുമുള്ള ശ്രമങ്ങൾ നടന്നുവരുന്നതായി അദ്ദേഹം അറിയിച്ചു. ഫൗണ്ടേഷൻ വർക്കിംഗ് പ്രസിഡൻറ് ജോർജ്ജ് മാത്യു, നടൻ മോഹൻ അയിരൂർ, തിരുവല്ല സർക്കിൾ ഇൻസ്പെക്ടർ വിനോദ് പി.എസ്, സെക്രട്ടറി കൈലാസ് എസ്, റസിഡൻ്റ്സ് അസോസിയേഷൻ പ്രസിഡൻ്റ് തങ്കമ്മ എബ്രഹാം, മുൻ പ്രസിഡൻ്റ് ഡോ.ആർ.വിജയമോഹനൻ, ജോസ് പെരുന്തുരുത്തി,വിമൽകുമാർ എന്നിവർ സംസാരിച്ചു. എം.ജി.സോമന്റെ മകൻ സാജി സോമൻ, മകൾ സിന്ധു ഗിരീഷ്, മരുമകൾ ബിന്ദു, ചെറുമക്കൾ എന്നിവരും ചടങ്ങുകളിൽ പങ്കെടുത്തു.