മല്ലപ്പള്ളി : നാല് വർഷത്തിലധികം നികുതി കുടിശിഖയുള്ള വാഹനങ്ങൾക്ക് സർക്കാർ ഏർപ്പെടുത്തിയിരുന്ന ഒറ്റത്തവണ തീർപ്പാക്കൽ പദ്ധതി 31ന് അവസാനിക്കും. 2020 ഏപ്രിൽ ഒന്നുവരെ നികുതി അടക്കാത്ത ട്രാൻസ്‌പോർട് വാഹനങ്ങൾക്ക് അവസാന നാലു വർഷത്തെ നികുതിയുടെ 30 ശതമാനവും നോൺ ട്രാൻസ്‌പോർട് വാഹനങ്ങൾക്ക് 40 ശതമാനവും അടച്ച് നികുതി ബാദ്ധ്യതയിൽ നിന്നും ഒഴിവാകാവുന്നതാണ്. വാഹന ഉടമയോ കൈവശക്കാരനോ സത്യവാങ്മൂലം സമർപ്പിച്ചാൽ നാലു വർഷത്തിൽ കൂടുതലുള്ള നികുതി കുടിശിഖക്ക് ജപ്തി നടപടികളിൽ ഉൾപ്പെട്ടവർക്കും ഈ ആനുകൂല്യം പ്രയോജനപ്പെടുത്താം. ഈ പദ്ധതി പ്രകാരം വാഹനം കൈവശമില്ലെങ്കിലോ കൈമാറ്റം ചെയ്തിട്ടും ഉടമസ്ഥാവകാശം മാറ്റാത്തതോ പൊട്ടിപ്പൊളിഞ്ഞതും ഉപയോഗശൂന്യമായതുമായ വാഹനഉടമകൾക്കും ഈ അവസരം പ്രയോജനപ്പെടുത്താമെന്ന് മല്ലപ്പള്ളി ജോയിന്റ് ആർ.ടി.ഒ ഒ.എ.മാത്യു അറിയിച്ചു.