കൊട്ടിയം: എക്സ്പ്രസ് സ്പെഷ്യലായി മുഖം മാറിയ പുനലൂർ - മധുര പാസഞ്ചർ ട്രെയിൻ സർവീസ് ആരംഭിച്ചു. അതേസമയം ടിക്കറ്റ് നിരക്ക് കുത്തനെ വർദ്ധിപ്പിച്ചതായി ആരോപണമുണ്ട്. തിരുവനന്തപുരം മുതൽ മയ്യനാട് വരെ ഓർഡിനറി ടിക്കറ്റിന് 50 രൂപയും സ്ലീപ്പറിന് 145 രൂപയും തേർഡ് എ.സിക്ക് 505 രൂപയുമാണ് പുതുക്കിയ നിരക്ക്.

നിരവധി റെയിൽവേ സ്റ്റേഷനുകളിലെ സ്റ്റോപ്പുകൾ റദ്ദാക്കിയെങ്കിലും ശക്തമായ ബഹുജന പ്രക്ഷോഭം നടന്ന മയ്യനാട് സ്റ്റേഷനിൽ സ്റ്റോപ്പ് അനുവദിച്ചിട്ടുണ്ട്. ടിക്കറ്റ് നിരക്കിലെ വർദ്ധന ഒഴിവാക്കണമെന്നും സ്ഥിരം യാത്രക്കാരുടെ സീസൺ ടിക്കറ്റ് സംവിധാനം ഉടൻ നടപ്പിലാക്കണമെന്നും ആവശ്യപ്പെട്ട് റെയിൽവേ മന്ത്രിക്ക് നാളെ 101 ഇ - മെയിൽ അയക്കുമെന്ന് മയ്യനാട് റെയിൽവേ പാസഞ്ചേഴ്സ് ആക്ഷൻ കൗൺസിൽ പ്രസിഡന്റ് കെ. നജിമുദ്ദീൻ, സെക്രട്ടറി റോജി രവീന്ദ്രൻ എന്നിവർ അറിയിച്ചു.