 പ്രമുഖരുമായി രണ്ട് മണിക്കൂർ കൂടിക്കാഴ്‌ച

കൊല്ലം: നിയമസഭാ തിരഞ്ഞെടുപ്പിന് മുന്നോടിയായുള്ള കേരള പര്യടനത്തിന്റെ ഭാഗമായി മുഖ്യമന്ത്രി പിണറായി വിജയൻ ഇന്ന് കൊല്ലത്തെത്തും. രാവിലെ 10ന് ബീച്ച് റോഡിലെ ക്വയിലോൺ ബീച്ച് ഹോട്ടലിൽ ജില്ലയിലെ വിവിധ മേഖളകളിലെ പ്രമുഖരുമായി ചർച്ച നടത്തും. ജില്ലയിലെ ഇടത് മുന്നണി നേതൃത്വം ക്ഷണിക്കുന്ന നൂറിനടുത്ത് ആളുകളാണ് ചർച്ചയിൽ പങ്കെടുക്കുക. പങ്കെടുക്കുന്ന എല്ലാവരും ജില്ലയുടെ വികസന സാദ്ധ്യതകൾ, ആവശ്യങ്ങൾ എന്നിവ സംബന്ധിച്ച് എഴുതി തയ്യാറാക്കിയ കുറിപ്പുകൾ കൈമാറും. പങ്കെടുക്കുന്ന എല്ലാവർക്കും ചർച്ചയിൽ പങ്കെടുക്കാൻ അവസരം ലഭിക്കില്ല.

ചർച്ചകൾക്ക് ശേഷം മുഖ്യമന്ത്രി മറുപടി നൽകും. 12ന് ചർച്ചകൾ അവസാനിപ്പിച്ച് മുഖ്യമന്ത്രി മടങ്ങും. അടുത്ത നിയമസഭാ തിരഞ്ഞെടുപ്പിന്റെ പ്രകടന പത്രികയിൽ കൊല്ലത്തിന്റെ വികസന ആവശ്യങ്ങൾ തിരിച്ചറിഞ്ഞ് ഉൾപ്പെടുത്തുകയാണ് പ്രധാന ലക്ഷ്യം. പൂർണമായും കൊവിഡ് മാനദണ്ഡം ഉറപ്പാക്കും. മുഖ്യമന്ത്രി പങ്കെടുക്കുന്നതിനാൽ വലിയ സുരക്ഷാ സംവിധാനങ്ങളും പൊലീസ് ഒരുക്കുന്നുണ്ട്. സാമ്പത്തിക രംഗത്തെ പ്രമുഖർ, കാർഷിക - വ്യാവസായിക രംഗങ്ങളിലെ പ്രമുഖർ തുടങ്ങിയവരാണ് പങ്കെടുക്കുന്നവരിൽ അധികവും.