 സാം.കെ. ഡാനിയേലും സുമലാലും അധികാരമേറ്റു

കൊല്ലം: അഡ്വ. സാം.കെ. ഡാനിയേൽ ജില്ലാ പഞ്ചായത്ത് പ്രസിഡന്റായും അഡ്വ. സുമലാൽ വെെസ് പ്രസിഡന്റായും അധികാരമേറ്റു. ജില്ലാ കളക്ടറുടെ അഭാവത്തിൽ എ.ഡി.എം പി.ആ‌ർ. ഗോപാലകൃഷ്ണനാണ് സാം.കെ. ഡാനിയേലിന് സത്യവാചകം ചൊല്ലിക്കൊടുത്തത്.

ഓച്ചിറയിലെ സി.പി.ഐ അംഗം ഗേളി ഷൺമുഖൻ സാം.കെ. ഡാനിയേലിന്റെ പേര് നിർദേശിച്ചു. കൊറ്റങ്കരയിൽ നിന്നുള്ള സി.പി.എം പ്രതിനിധി എൻ.എസ്. പ്രസന്നകുമാർ പിന്താങ്ങി. രാവിലെ 11ന് ജില്ലാ പഞ്ചായത്ത് കൗൺസിൽ ഹാളിൽ നടന്ന തിരഞ്ഞെടുപ്പിൽ സാം.കെ. ഡാനിയേൽ 22 വോട്ടും യു.ഡി.എഫിന്റെ ബ്രിജേഷ് എബ്രഹാം മൂന്ന് വോട്ടും നേടി. അഞ്ചലിൽ നിന്നുള്ള സി.പി.എം അംഗം സി. അംബികാ കുമാരിയുടെ വോട്ട് അസാധുവായി.

ഉച്ചയ്ക്ക് ശേഷം നടന്ന വൈസ് പ്രസിഡന്റ് തിരഞ്ഞെടുപ്പിൽ നെടുവത്തൂരിൽ നിന്നുള്ള അഡ്വ. സുമലാൽ വൈസ് പ്രസിഡന്റായി തിരഞ്ഞെടുക്കപ്പെട്ടു. സുമലാൽ 23 വോട്ട് നേടിയപ്പോൾ യു.ഡി.എഫിലെ ആർ.രശ്‌മി മൂന്ന് വോട്ട് നേടി. എൽ.ഡി.എഫ് 23, യു.ഡി.എഫ് മൂന്ന് എന്നിങ്ങനെയാണ് ജില്ലാ പഞ്ചായത്ത് കക്ഷിനില.

ചടയമംഗലം ഡിവിഷനിൽ നിന്ന് 9,385 വോട്ടിന്റെ ഭൂരിപക്ഷത്തിൽ വിജയിച്ചാണ് സാം.കെ. ഡാനിയേൽ ജില്ലാ പഞ്ചായത്ത് കൗൺസിലിൽ എത്തിയത്. സി.പി.ഐ ജില്ലാ എക്സിക്യുട്ടീവ് അംഗമായ സാം.കെ.ഡാനിയേൽ എ.ഐ.എസ്.എഫിന്റെയും എ.ഐ.വൈ.എഫിന്റെയും ജില്ലാ സെക്രട്ടറിയായിരുന്നു. മുൻപ് പാർട്ടി ജില്ലാ അസി. സെക്രട്ടറിയായിരുന്നു. ഇളമാട് പഞ്ചായത്ത് പ്രസിഡന്റായും ചടയമംഗലം ബ്ലോക്ക് പഞ്ചായത്ത് വൈസ് പ്രസിഡന്റായും പ്രവർത്തിച്ചിട്ടുണ്ട്.

സി.പി.എം തേവലപ്പുറം ലോക്കൽ കമ്മിറ്റി അംഗമാണ് സുമലാൽ. ലോയേഴ്സ് യൂണിയൻ സംസ്ഥാന കമ്മിറ്റി അംഗം, ജനാധിപത്യ മഹിളാ അസോസിയേഷൻ നെടുവത്തൂർ ഏരിയാ സെക്രട്ടറി, ജില്ലാ കമ്മിറ്റി അംഗം എന്നീ നിലകളിലും പ്രവർത്തിക്കുന്നു.

ഇടതുപക്ഷ ജനാധിപത്യ മുന്നണിയിലെ ധാരണയനുസരിച്ച് ജില്ലാ പഞ്ചായത്തിൽ ആദ്യ രണ്ടരവർഷം പ്രസിഡന്റ് പദവി സി.പി.ഐയ്ക്കാണ്. അവസാന രണ്ടര വർഷം സി.പി.എമ്മിനും. തിരഞ്ഞെടുപ്പിന് ശേഷം ജില്ലാ പഞ്ചായത്ത് ജയൻ സ്മാരക ഹാളിൽ നടന്ന അനുമോദന സമ്മേളനം മന്ത്രി കെ. രാജു ഉദ്ഘാടനം ചെയ്തു. ചിറ്റയം ഗോപകുമാർ എം.എൽ.എ, സി.പി.ഐ സംസ്ഥാന അസി. സെക്രട്ടറി കെ. പ്രകാശ് ബാബു, സി.പി.എം ജില്ലാ സെക്രട്ടറി എസ്. സുദേവൻ തുടങ്ങിയവർ പങ്കെടുത്തു.