കൊടുങ്ങല്ലൂർ: കൊടുങ്ങല്ലൂർ ശ്രീകുരുംബ ഭഗവതി ക്ഷേത്രത്തിന്റെ പരമാധികാരിയായ കൊടുങ്ങല്ലൂർ വലിയ തമ്പുരാൻ രാമവർമ്മ രാജ (97) ദിവംഗതനായി. തൃശൂർ പാറമേക്കാവ് ശാന്തിഘട്ടിൽ സംസ്‌കാരം നടത്തി. ബുധനാഴ്ച പുലർച്ചെ രണ്ട് മണിയോടെ തൃശൂർ കേരളവർമ്മ കോളേജിനു സമീപമുള്ള സ്വവസതിയിലായിരുന്നു അന്ത്യം.

കൊടുങ്ങല്ലൂർ ചിറയ്ക്കൽ കോവിലകത്ത് കൊഞ്ചു കുട്ടി തമ്പുരാട്ടിയുടെയും തെക്കേടത്ത് കടലായിൽ നാരായണൻ തമ്പൂതിരിയുടെയും മകനാണ് നാരായണൻ രാജയെന്ന രാമവർമ്മ രാജ. കൊടുങ്ങല്ലൂർ വലിയ തമ്പുരാനായിരുന്ന കെ.ഗോദവർമ്മ രാജ മരണമടഞ്ഞതിനെ തുടർന്ന് 2012 ലാണ് ഉറച്ച കമ്മ്യൂണിസ്റ്റ് ആശയക്കാരനായ രാമവർമ്മ രാജ വലിയ തമ്പുരാനായി സ്ഥാനമേറ്റത്.ഈ പദവിയിൽ അദ്ദേഹം തുടർന്നപ്പോഴും കമ്മ്യൂണിസ്റ്റ് ആശയങ്ങൾ കൈവിട്ടിരുന്നില്ല.

കൊടുങ്ങല്ലൂർ ഭഗവതിയുടെ പ്രതിപുരുഷനായിട്ടാണ് ഭക്തർ അദ്ദേഹത്തെ കണ്ടിരുന്നത്. ഭരണി നാളിൽ കൊടുങ്ങല്ലൂർ വലിയ തമ്പുരാനെ കണ്ട് അനുഗ്രഹം വാങ്ങിയ ശേഷമേ ഭക്തർ തിരിച്ചു പോവുകയുള്ളൂ. 2019ലെ മീനഭരണി മഹോത്സവച്ചടങ്ങുകൾക്ക് പങ്കെടുക്കാനാണ് അവസാനമായി കൊടുങ്ങല്ലൂരിലെത്തിയത്. ഭാര്യ: ദിവംഗതയായ മംഗള തമ്പുരാട്ടി. ഏകമകൾ: ഐഷ.