ചേലക്കര: കാട്ടുപന്നി ഇടിച്ച് നിയന്ത്രണം വിട്ട ഓട്ടോറിക്ഷ തലകീഴായി മറിഞ്ഞ് ഡ്രൈവർക്ക് ഗുരുതര പരിക്ക്. പാഞ്ഞാൾ സ്വദേശി നാരായണൻകുട്ടിക്കാണ് (40) പരിക്കേറ്റത്. ഇയാളെ ആദ്യം ചേലക്കരയിലെ സ്വകാര്യ ആശുപത്രിയിലും തുടർന്ന് വിദഗ്ദ്ധ ചികിത്സക്കായി വാണിയംകുളത്തെ സ്വകാര്യ ആശുപത്രിയിലും പ്രവേശിപ്പിച്ചു. വാഹനത്തിലുണ്ടായിരുന്ന യാത്രക്കാരായ രജനിക്കും (48) ഇവരുടെ മകൾക്കും മകനും പരിക്കേറ്റിട്ടുണ്ട്. ഇവരെ മുഖാരിക്കുന്ന് ഗവ. ആശുപത്രിയിൽ പ്രവേശിപ്പിച്ചു. സൈക്കിളിൽ നിന്ന് വീണ് പരിക്കേറ്റ രജനിയുടെ മകനെ മുഖാരിക്കുന്ന് ഗവ.ആശുപത്രിയിൽ കാണിക്കാനായി വരുന്ന വഴിക്ക് ഇന്നലെ രാത്രി തോന്നൂർക്കര വളവിൽ വച്ചായിരുന്നു അപകടം.