തൃശൂർ: കൃഷി വകുപ്പിന് കീഴിലെ കേരള അഗ്രോ ഇൻഡസ്ട്രീസ് കോർപറേഷന്റെ ആഭിമുഖ്യത്തിൽ സംഘടിപ്പിക്കുന്ന കേരളശ്രീ കാർഷിക മേളയ്ക്ക് തുടക്കമായി. തൃശൂർ ചെമ്പുക്കാവ് കാർഷിക സമുച്ചയത്തിൽ പ്രവർത്തിക്കുന്ന കേരളശ്രീ അഗ്രോ ഹൈപ്പർ ബസാറിൽ ഗവ ചീഫ് വിപ്പ് അഡ്വ കെ.രാജൻ മേള ഉദ്ഘാടനം ചെയ്തു. അഗ്രോ ഹൈപ്പർ ബസാറിന്റെ മൂന്നാം വാർഷികവും ക്രിസ്മസ് ന്യൂഇയർ ആഘോഷങ്ങളോടും അനുബന്ധിച്ചാണ് മേള സംഘടിപ്പിക്കുന്നത്. വ്യത്യസ്തങ്ങളും ഗുണമേന്മയും നിറഞ്ഞ നിരവധി ഉത്പന്നങ്ങളും, കിഴങ്ങ് വർഗങ്ങൾ ഉൾപ്പെടെയുള്ള കാർഷിക വിഭവങ്ങളും കൃഷിക്കാവശ്യമായ സാമഗ്രികളും മേളയിൽ ഒരുക്കിയിട്ടുണ്ട്. കുടുംബ ശ്രീ, കേരഫെഡ്, കെയ്‌ക്കോ ഉൽപ്പന്നങ്ങളും ഹോർട്ടികോർപ് പഴം പച്ചക്കറികളും കോയമ്പത്തൂർ കെ.വി.കെ സൊസൈറ്റിയുടെ മില്ലെറ്റ് മൂല്യവർധിത ഉൽപ്പന്നങ്ങളും അഗ്രോ മെഷീനറികളും മേളയുടെ ഭാഗമാണ്. ഉപഭോക്താക്കൾക്ക് കിഴിവുകളും സമ്മാനങ്ങളും മേളയുടെ ഭാഗമായി ഒരുക്കിയിട്ടുണ്ട്. 500 രൂപയ്ക്കുമേൽ വാങ്ങുന്ന ഉൽപ്പന്നങ്ങൾക്ക് പ്രത്യേക ഡിസ്‌കൗണ്ടും മറ്റ് സമ്മാനങ്ങളും ലഭിക്കും. ജനുവരി 9 മുതൽ രാവിലെ 9 മുതൽ വൈകിട്ട് 6 വരെയാണ് മേള നടക്കുക. ചടങ്ങിൽ ജില്ലാ കൃഷി ഓഫീസർ മാത്യു ഉമ്മൻ, കൈയ്‌കോ ഡിവിഷനൽ എൻജിനീയർ പി ആർ സുരേഷ് കുമാർ, ആത്മ ഡെപ്യൂട്ടി ഡയറക്ടർ ഡോ ജയന്തി, അസിസ്റ്റന്റ് സോയിൽ കെമിസ്റ്റ് ഷീല തുടങ്ങിയവർ പങ്കെടുത്തു.